800 il əvvəl tərənnüm etdiyi şəhərdə dahi şairə qarşı hörmətsizlik

Azərbaycan oxucusuna dahi Nizami Gəncəvinin kim olduğunu tanıtmaq istəyi absurddur. Təbii ki, biz də bu istəkdən uzağıq. Nizami özünün söz ordusu ilə bütün dünyanı fəth edən elə qüdrətli sərkərdədir ki, dünya durduqca yaşayacaqdır. Uzun əsrlərdir ki, bu söz sərrafının əqli, zəkası, müdrikliyi, həyata baxışı, bütün zamanlar üçün yeni olan fəlsəfəsi hər kəsi heyrətə gətirir.

Dünya xəritəsində kiçik bir nöqtə olan Azərbaycan belə bir övladı ilə zaman-zaman fəxr edib, qürur duyub. Yaratdığı nadir sənət əsərləri ilə ölməzlik qazanan şairin adının parklara, küçə və prospektlərə, elm və təhsil ocaqlarına verilməsi, ölkənin müxtəlif şəhərlərində şairin əzəmətli heykəllərinin qoyulması qədirbilən xalqımız üçün bir təsəllidir.

Çox təəssüf ki, Qarabağın mərkəzi sayılan Bərdədə Nizamisevərlərə xeyli vaxtdı ki, bir acı yaşatdırırlar. Buna səbəb şəhərin mərkəzində ucaldılmış şairin əzəmətli heykəlinin götürülməsidir...

Dörd il əvvəl rayon mərkəzində yenidənqurma, abadlıq işləri bəhanəsilə şairin Nizami küçəsində ucalan heykəli rayon rəhbərliyinin istəyi ilə götürüldü. Bu yanlış addıma etiraz edənləri sakitləşdirmək üçün dedilər ki, heykəl tezliklə daha abad bir məkanda qoyulacaq. Artıq o vaxtdan illər keçir. Heykəl isə 18 nömrəli yol istismar idarəsinin qarajında dustaq ömrü yaşayır. Bir zamanlar şair Bərdəni tərənnüm edərək yazırdı:

Bərdə nə gözəldir, necə qəşəngdir
Yazı da, qışı da güldür, çiçəkdir...

Bizi bağışla şair, sənin müqəddəs ruhun qarşısında günahkarıq. Sən səkkiz yüz il əvvəl Bərdəni nəzmə çəkib tərənnüm etdin, biz isə əndazəyə sığmayan sayğısızlıq göstərib sənin heykəlini götürdük. Bu utanc verən hadisədən illər keçsə də, özümüzdə güc toplayıb kifayət qədər böyük olan Bərdə şəhərində münasib bir yer tapıb sənin heykəlini yenidən ucalda bilmirik.

Xalqın böyük oğlu Heydər Əliyev öz zəngin mənəviyyatına, millətsevərliyinə uyğun olaraq Nizami Gəncəvi irsinə həmişə sonsuz hörmət və ehtiramını bildirmişdir. Məhz xalqımızın ümummilli lideri Heydər Əliyevin təşəbbüsü ilə "Azərbaycanın böyük şairi və mütəfəkkiri Nizami Gəncəvinin irsinin öyrənilməsini, nəşrini və təbliğini daha da yaxşılaşdırmaq tədbirləri haqqında" 1979-cu il 6 yanvar tarixli qərar qəbul edilmişdir. Bu qərar Nizami irsinə dövlət səviyyəsində yeni münasibətin təməlini qoydu və şairin təbliğində yeni perspektivlər açdı.

Bu gün də ölkəmizdə dünya şöhrətli Nizami Gəncəviyə dövlət səviyyəsində son dərəcə isti münasibət mövcuddur. Respublika Prezidenti İlham Əliyevin “Dahi Azərbaycan şairi və mütəfəkkiri Nizami Gəncəvinin 870 illik yubileyinin keçirilməsi haqqında” imzaladığı 23 dekabr 2011-ci il tarixli sərəncam bütün Nizamisevərlərin böyük sevincinə səbəb olub. İndi respublikamızda bu əlamətdar yubileyə ciddi hazırlıq görülür. Şairin vətəni Gəncədə Nizami məqbərəsinin xüsusi zövqlə yenidən qurulması, böyük bir ərazidə məqbərənin ətrafının abadlaşdırılması əsl vətəndaşlıq mövqeyindən görülən alqışa layiq işlərdir. Təsadüfi deyil ki, bu yaxınlarda Gəncəyə səfər edən dövlət başçısı şəhərin qədimliyini qoruyub saxlamaqla burada həyata keçirilən genişmiqyaslı abadlıq, quruculuq işlərini yüksək qiymətləndirdi.

Son aylar Bərdədə başlayan genişmiqyaslı quruculuq işləri yeni ümidlər doğurur. Yeni salınan parklar, abadlaşan küçələr, işlərin yaxşıya doğru dönüşü düşünməyə əsas verir ki, dahi şairimiz Nizami Gəncəvinin əzəmətli abidəsi qədim şöhrətli Bərdədə yenidən ucalacaq. Bu istəyin tezliklə reallaşması Bərdədə hər kəsin arzusudur. Çünki dahi şairin müqəddəs ruhu qarşısında günahlardan qurtulmaq, xəcalət yükündən xilas olmaq, yüngülləşmək gərəkdir.

Bizi bağışla, şair! Məhəbbətlə tərənnüm etdiyin Bərdənin övladları sənə mənəvi borclarını layiqincə qaytara bilmədilər. Buraxılan səhvi düzəltmək, yol verilən günahı yumaq üçün göstərilən cəhd isə heç zaman gec deyil!