Musa Uzunlar Azərbaycan serialında oynayacaq

Bu gün günorta saatlarında Bakıya “Kurtlar vadisi” serialından İsgəndər, “Fatmagülün suçu nə?” serialından isə Reşat Yaşaran kimi tanınan məşhur aktyor Musa Uzunlar gələcək. Azərbaycan və Türkiyə kinematoqrafçıları yeni serial çəkilişləri üçün bir araya gəliblər. Gün.az-ın verdiyi məlumata görə, aktyor Azərbaycanda çəkilən filmdə rol alıb.
Artıq 20 gündür ki, çəkilişləri başlayan və bir çox məşhur Azərbaycan və türk aktyorlarının iştirak edəcəyi serial “Qaranlıqlar çiçəyi” adlanır. Melodram janrında çəkilən serial 39 seriyadan ibarət olacaq. Serialın nümayişi isə artıq gələn aydan etibarən başlamalıdır.
Filmin rejissoru Türkiyənin “Kanal D” televiziyasında yayımlanan “Aşk Yakar” serialının da rejissoru olan Mehmet Ulukan, operatoru isə “Kurtlar Vadisi”nin operatoru Bülent Özekdir.
Xatırladaq ki, bundan başqa rolları Azərbaycan tərəfdən Rasim Balayev, Səfurə Əlizadə, Günəş Mehdi, Nəsimi Mirzə, Abbas Qəhrəman, Zaur Şəfi, Arifə İslam və Vüqar Əlinin oynayacağı gözlənilir. Türkiyə tərəfdən isə “Kurtlar Vadisi Pusu”dan məşhur olan Osman Albayrak, Mustafa Üstündağ (“Kurtlar Vadisi Pusu”da Muro), Bülent Şakrak, Begüm Kütük, Hüseyin Avni Danyal (“Kurtlar Vadisi Pusu”da Bulut), Ebru Özkan, Güler Ökten kimi tanınmış aktyorlar rol alacaq.
Qeyd edək ki, ən qürur verici məqamlardan biri də serialın quruluşçu rəssamının Azərbaycanın dünya şöhrətli gənc rəssamı Nərminə Vəliyevanın olmasıdır.

7GUN.AZ