"Bu konsertlə Nardarandakı 130 saylı məktəbin bərpası tamamlana bilər"

Məşhur azərbaycanlı ifaçı və bəstəkar Emin Ağalarovun Bakıda verəcəyi konsertlə bağlı yeni xəbərlər var. ANS PRESS-in məlumatına görə, ifaçı 22 dekabrda Bakıda verəcəyi konserti ilə bağlı onu sevənlərə müraciət edib:

"Bakıda verəcəyim konsert əvvəlki konsertlərim kimi xeyriyyə məqsədi daşıyır. Konsertdən əldə edilən vəsaitlə Nardarandakı 130 saylı məktəbin bərpasının son mərhələləri tamamlana bilər. Biz bu layihəni keçən il başladıq. Mənim Bakıda verdiyim son 2 konsertimdən əldə edilən pullarla artıq məktəbin bütün pəncərələri, damı və istilik sistemini yeniləmişik. Həmçinin mühüm təmirləri başa çatdırmağı bacardıq. Məktəb yeni girişə və gimnastika avadanlığına malikdir. Mənim ümidim 22 dekabradır. Həmin gün verəcəyim konsertdən toplanmış pullarla biz yenidənqurmanı tamamlaya bilərik".

"Bu, mənim ürəyimcə olan bir layihədir - bunu sevənlərimlə bölüşməkdən çox şadam. Konsertlərdə onlardan aldığım dəstəklə biz çox qiymətli töhfə etmiş oluruq. Mənim Bakı konsertlərim məktəbdəki yenidənqurmanın sona çatdırılmasına səbəb olacaq və biz bununla çox fəxr edə bilərik!", deyə Emin Ağalarov əlavə edib.

Qeyd edək ki, müğənni-bəstəkar Emin Ağalarov dekabrın 22-də Bakıda Heydər Əliyev Sarayında konsert verəcək. Sənətçi bu konserti ilə 2012-ci il üçün nəzərdə tutulan dünya turnesinə start verəcək. Sözügedən konsert müğənni-bəstəkarın karyerasında yeni mərhələ olacaq.

Emin Ağalarov hazırda məşhur prodüserlərdən hesab olunan Piter Berdlə çalışır və konsertə aktiv hazırlaşır. Konsert proqramının quruluşu ilə məşğul olan prodüser EMİNin bu konsertinin çox möhtəşəm olacağını deyir: "Sözügedən konsert olduqca maraqlı tamaşa olacaq. Bu şouda EMİNin geniş yaradıcılıq potensialının və səhnə ustalığının şahidi olacaqsınız. Tamamilə yeni şou hazırlamışıq. EMİNin çıxışı məxsusi olaraq bu şou üçün hazırlanmış fövqəladə qrafikalarla işlənmiş müasir videogörüntülərlə müşahidə olunacaq."

Bu konsert Yeni İl ərəfəsində ən möhtəşəm şou-proqramlardan biri olacaq. Çıxış zamanı müasir işıq və texniki avadanlıqların, yüksək səviyyəli dekorasiyaların quraşdırılması nəzərdə tutulub.

Emin Ağalarov özü Bakı konserti haqqında bunları deyir: "Mən Bakıdakı sadiq pərəstişkarlarıma yeni hazırladığımız şounun premyerasını təqdim etməkdə çox şadam. Dünya bu şounu ancaq gələn il görə biləcək. Proqramda çoxlu yeni mahnılar və artıq sevilən hitlərim olacaq".

Konsertdə Azərbaycana qalibiyyət sevinci yaşadan "Eurovision - 2011" mahnı müsabiqəsinin birinciləri Ell və Nikkinin ( Eldar Qasımov və Nigar Camal ) iştirakı da gözlənilir.