Azərbaycanda Qaradağ rayonunda palçıq vulkanların yerləşdiyi ərazidə son 5 ay ərzində aparılan əməliyyatlar zamanı 143 ədəd müxtəlif iri çaplı partlamamış döyüş sursatları aşkarlanaraq zərərsizləşdirilib

Bu barədə Azərbaycan Ərazilərinin Minalardan Təmizlənməsi üzrə Milli Agentliyin (ANAMA) Xüsusi Əməliyyat Qrupunun supervayzeri Füzuli Namazov məlumat verib.

ANAMA mütəxəssisinin sözlərinə görə, əməliyyatların başlandığı avqust ayından dekabrın sonunadək 807100 kvadratmetr əraziyə baxış keçirilib. Tapılan sursatlar əsasən 125 mm-lik tank, kumulyativ mərmilər və 100 mm-lik top mərmiləridir.

«Ərazidə təmizləmə işləri Ekologiya və Təbii Sərvətlər Nazirliyinin sifarişi əsasında aparılır və təqribən bu ilin avqust ayınadək davam edəcəyi gözlənilir», - deyə F. Namazov vurğulayıb.

Qeyd edək ki, palçıq vulkanların yerləşdiyi ərazi vaxtı ilə hərbi poliqon olub. Orada hərbi aviasiya və artilleriya təlimləri keçirilib.