“Azərbaycan “Şərq tərəfdaşlığı” çərçivəsində regional əməkdaşlıqdan yayınır”

Bu sözləri azərbaycanlı millət vəkillərinin də iştirakı ilə Ermənistanda keçirilən Avronest Parlament Assambleyasının sosial, təhsil, mədəni və mülki işlər üzrə komitəsinin iclasında çıxışı zamanı “Firavan Ermənistan” Partiyası fraksiyasının nümayəndəsi Naira Zoqrabyan deyib. O bildirib ki, bir neçə dəfə Azərbaycana “Şərq əməkdaşlığı” çərçivəsində əməkdaşlıq etmək təklif olunsa da, həmişə mənfi cavabı alınıb: “Bu halda biz ümid edirik ki, Azərbaycan deputatlarının söylədiyi kimi bu proses sürətlənəcək”.
Azərbaycan Milli Məclisinin deputatı Azay Quliyev isə öz növbəsində qeyd edib ki, Azərbaycan üçün regional əməkdaşlıq çox əhəmiyyətlidir. Onun sözlərinə görə, energetika, nəqliyyat və başqa sahələrdə Bakı– Tiflis – Ceyhan neft kəməri kimi bir çox nümunələr var: “Amma biz Ermənistan və Azərbaycan arasında əməkdaşlıq haqqında danışanda Dağlıq Qarabağ üzrə münaqişəsi ilə bağlı ciddi çağırışla rastlaşırıq. Hər kəs bilir ki, Azərbaycanın 20% ərazisi işğal altındadır, 1 milyondan çox məcburi köçkünü var. Biz əməkdaşlığa hazırıq, amma inanın, bizim üçün bu çox çətindir. Biz əməkdaşlığa qarşı deyilik, biz sadəcə münaqişənin həlli ilə bağlı narahatıq. Bundan sonra mən əməkdaşlıq üçün ciddi imkanlar görürəm”.
Azay Quliyev onu da söyləyib ki, Avrones nümayəndə heyəti bu gün Ermənistan prezidenti Serj Sarkisyanla görüşüb: “Biz parlament üzvləri arasında dialoqa başladıq. Prezident Sarkisyan da bildirdi ki, dialoq davam edə bilər. Bunun üçün yaxşı şərait yaratmalıyıq”.
Azay Quliyevin bu çıxışı isə N. Zoqrabyanı hiddətləndirib. Belə ki, o azərbaycanlı millət vəkilinin çıxışına tənqidi cavab verib: “Mən ümid edirdim ki, bu salon ritorika üçün tribuna olmayacaq. Azərbaycan deputatları istənilən beynəlxalq salondan “20%” və “1 milyon” rəqəmlərini təkrarlamaq üçün istifadə edirlər. Beynəlxalq cəmiyyət artıq bundan yoruldu”.
Zoqrabyanın bu çıxışından ürəklənən Ermənistan Respublika Partiyasının deputatı Ovanes Saakyan da məsələyə qarışıb: “Biz cavab arqumentləri gətirə bilərik, amma görüşümüzün mövzusu başqadır. Buna görə də erməni qonaqpərvərliyini göstərərək, mövzudan yayınmaq istəməzdik”.