Cinayətkar dəstənin "Abdulhey"ini kimlər himayə edir?

Ötən gün Ucar rayon sakinlərinin “Kurtlar Vadisi” adı ilə tanınan cinayətkar dəstə haqqında redaksiyamıza etdiyi müraciəti dərc etmişdik. Mətbuatın gündəmindən düşməyən “Kurtlar Vadisi” adı ilə tanınan cinayətkar dəstə barəsində daha bir məlumat yayılıb. Hüquq müdafiəçisi Taleh Xasməmmədov 7GUN.AZ xəbər portalına bildirib ki, dəstənin “Abdulhey”i kimi tanınan Elçin Əliyev tərəfindən zorlanmış 16 yaşlı Zülfiyyə Rüstəmova Türkiyəyə satılmaq məqsədi ilə qaçırılıb.
O bildirib ki, bu barədə məlumatı ona Z.Rüstəmovanın anası Ülviyyə Rüstəmova verib. Belə ki, Ü.Rüstəmovanın sözlərinə görə, 9 sentyabr 2011-ci il tarixində qızı Zülfiyyə Ucar rayonunda yaşayan Ədilə adlı qadın və İsmayıllı rayon Polis Şöbəsinin Səlim adlı əməkdaşı ilə birgə qaçırılıb. “Qızımı zorlamaq istəyiblər. O, buna imkan vermədiyi və müqavimət göstərdiyi üçün zorakılığa məruz qalıb. Belə ki, qızıma bıçaq və lezva ilə xəsarət yetiribər. Bundan başqa da, qızımın damarlarına narkotik maddə vurublar”.
Hüquq müdafiəçisinin dediyinə görə, Z.Rüstəmova onların əlindən qaçmaqla canını qurtara bilib və Ucar rayonuna qayıdıb. «Qızın anası Ülviyyə Rüstəmova Bakıda olduğundan məsələdən bir neçə gün sonra xəbər tutub. Növbəti dəfə eyni hərəkətlər isə sentyabrın 27-də baş verib. Bu dəfə Z.Rüstəmova etiraz etdiyindən onun boyun nahiyyəsini bıçaqla kəsiblər. Bir neçə yerdən yara alan Zülfiyyənin qanına zəhərlənmə keçib və o, 2 oktyabr 2011-ci il tarixində Respublika Mərkəzi Klinik Xəstəxanaya yerləşdirilib”.
Hüquq müdafiəçisi bildirib ki, baş verənlərlə bağlı qızın anası Ucar rayon Polis Şöbəsinə və rayon Prokurorluğuna məlumat verib. “Lakin Ucar rayon Polis Şöbəsinin rəis müavini İlham Əhmədov onlara kömək etmək əvəzinə, əxlaqsız təkliflər edib. O deyib ki, ona “iş verməsə” Ü.Rüstəmovaya köməklik göstərməyəcək».
T.Xasməmmədova daha sonra qeyd edib ki, insan alveri ilə məşğul olanlardan biri “Kurtlar Vadisi” adı ilə tanınan dəstənin üzvü Quliyeva Gülərxanım Abbas qızıdır. “Onun qızı Kamalə Quliyev da insan alveri ilə məşğul olur. Bu yaxınlarda Zülfiyyədən başqa, daha 5 qızı qaçıraraq Dubay və Türkiyəyə satmağa hazırlaşırlar. Hadisə ilə bağlı Baş Prokurorluğa və İnsan Alverinə Qarşı Mübarizə İdarəsinə məlumat verilib. İnanırıq ki, bununla bağlı tədbirlər görüləcək”.

7GUN.AZ