Sabirabadlılar isə deputatı verdiyi vədləri yerinə yetirməməkdə qınayırlar


“İrəli” İctimai Birliyinin sədri, deputat Ceyhun Osmanlının fəaliyyəti hakimiyyətin yuxarı dairələrini qane etmir. Bu barədə etibarlı mənbələrdən 7GUN.AZ xəbər portalına məlumat verilib. Məlumatda bildirilir ki, hakimiyyət Ceyhun Osmanlının yerinə Fuad Muradovu gətirmək niyyətindədir. Artıq Fuad Muradovla Ceyhun Osmanlı arasında münasibətlərin ziddiyyətli bir şəkil alması barədə də məlumatlar dolaşır.
Bildirilir ki, Ceyhun Osmanlının deputat seçildikdən sonra xeyli arxayınlaşması onun əleyhinə işləyib. Deputatın öz ətrafında olanlara etimadsız yanaşması isə bir çox gənclərin ondan uzaqlaşması ilə nəticələnib. Beləliklə, yaranmış fürsətdən istifadə edən Fuad Muradov “İrəli”yə sahib çıxmağa çalışır.
Bundan əlavə, seçiciləri də Ceyhun Osmanlıdan narazıdırlar. Bu da qarşı tərəfə planlarını gerçəkləşdirməyə imkan verib. Mənbə bildirir ki, ötən il Sabirabadda baş verən sel daşqınları zamanı rayonun deputatı kimi Ceyhun Osmanlı heç bir narahatçlıq ifadə etməmiş, seçicilərini taleyin ümidinə buraxmışdır.
Sakinlərin ondan narazı olduğunu deyən mənbə onu da vurğulayır ki, Ceyhun Osmanlı nəinki verdiyi vədləri yerinə yetirməmiş, hətta indiyədək seçiciləri ilə bir dəfə də olsun görüşməyib: “Bu güb Sabirabadda hər kəs Ceyhun Osmanlını axtarır, amma tapa bilmir. Belə çıxır ki, o, Sabirabadın deputatı olduğunu unudub. Ancaq unutmasın ki, növbəti dəfə Sabirabada gəlib xalqa yalan vəd verə bilməz. Çünki sabirabadlılar onu artıq tanıyırlar. Deputat dar gündə seçicisinin yanında olmalıdır” – deyə mənbə bildirir.
Məsələ ilə bağlı Ceyhun Osmanlı ilə əlaqə saxlamağa çalışdıq. Ancaq cəhdlərimiz nəticəsiz qaldı. Yəqin millət vəkilinin başı “İrəli”dəki qalmaqallardan açılmır. Yazıda adı çəkilən şəxslərin mövqeyini də dərc etməyə hazırıq.

Ramin