Feyzi Ağabəyovun isə həbs müddəti uzadıldı

Antikorrupsiya tədbirləri çərçivəasində hədəfə alınan hərbi komissarların təftiş edilməsi davam edir. Bu prosesin iri ranqlı məmurlardan biri tərəfindən həyata keçirildiyi bildirilir. Bu gün etibarlı mənbələrdən 7GUN.AZ xəbər portalına daxil olan məlumatda bildirilir ki, Binəqədi rayon hərbi komissarı Feyzi Ağabəyov barəsində seçilmiş həbs qətimkan tədbiri Bakı Hərbi Məhkəməsinin qərarı ilə daha 2 ay müddətinə uzadılıb. Bildirilir ki, sabiq hərbi komissar barəsində Bakı Hərbi Məhkəməsinin qəbul etdiyi qərardan müdafiə tərəfi Bakı Apelyasiya Məhkəməsinə apelyasiya şikayəti təqdim edib.
Mənbənin sözlərinə görə, hərbi komissar rüşvət alma, eləcə də hakimiyyətdən və qulluq mövqeyindən sui-istifadə etmə, hakimiyyət həddini aşma cinayətlərində ittiham olunur. Qeyd edək ki, Feyzi Ağabəyov cari ilin aprel ayında həbs olunub və o, əvvəllər Masallı rayonunda hərbi komissar vəzifəsini icra edib.
Məlumatda o da bildirilir ki, Hərbi Prokurorluq tərəfindən komissarlıqlarda aparılmış yoxlamalar nəticəsində bir sıra hallarda çağırışçıların hərbi xidmətə çağırışdan yayındırılması, saxta yollarla azad edilməsi, onlara hərbi həkim komissiyalarının rəyinə əsasən, qanunsuz möhlət verilməsi və valideynlərindən rüşvət alınması üzə çıxarılıb. Məhz bu faktlarla bağlı Bakı şəhərinin Binəqədi, Suraxanı rayon, Sumqayıt şəhər və respublikanın digər rayon hərbi komissarları barəsində CM-nin 311.1 (rüşvət alma (passiv rüşvətxorluq), 313 (vəzifə saxtakarlığı), 341.1 (hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə) maddələri ilə cinayət işləri başlanıb.
Mənbə bildirir ki, hazırda Füzuli və Beyləqan rayon hərbi komissarlıqlarında da yoxlamalar və araşdırmalar aparılır. Sözügedən rayonların hərbi komissarları korrupsiya və rüşvətxorluqda günahlandırılır. Yazıda adı çəkilən şəxslər də öz mövqeyini bildirə bilərlər.

7GUN.AZ