İcra başçısı və polis rəisi jurnalisti həbs etdirmək istəyir

7GUN.AZ xəbər portalının Saatlı rayonu üzrə bölgə müxbiri İlham Süleymanov təzyiqə məruz qalıb. Bu barədə əməkdaşımız özü məlumat verib. O bildirir ki, son vaxtlar rayonda baş verən problemləri ölkə mətbuatında işıqlandırdığına görə Saatlı rayon İcra Hakimiyyətinin başçısı Siraqəddin Cabbarovun və Polis İdarəsinin rəisi Cəbrayıl Vəliyevin qəzəbinə tuş gəlib. İlham Süleymanov bildirir ki, polis rəisi ona “bir də mətbuata informasiya ötürsən, rayonu tərk et” komandası verib: “Saatlıda baş verən hadisələrlə bağlı yazılar yazıram. Ötən ay icra başçısı məni yanına çağırdı. Qarşısında qəzet vardı. Mənə dedi ki, sənin yazın “Bizim yol” qəzetində dərc olunub. Bu da 25 avqust 2011-ci ilə təsadüf edir. Yazı “Saatlıda fövqəladə vəziyyətdir” başlığı ilə dərc olunmuşdu. Başçı mənə dedi ki, əgər əməllərini davam etdirsən, səni həbs etdirəcəm. Bir neçə gün bundan öncə polis rəisi Cəbrayıl Vəliyev evimə bir neçə polis göndərib məni çağırdı. Dedi ki, sən xəbər portallarından hansı ilə əməkdaşlıq edirsən? Mən də 7GUN.AZ-ın bölgə müxbiri olduğunu dedim. Rəis əsəbiləşərək üstümə qışqırdı ki, sənə deməmişdik mətbuata informasiya vermə. Bir də mətbuata informasiya ötürsən, rayonu tərk et. Mən Saatlı sakiniyəm. Rayonu tərk edib hara gedim? Bunların məqsədi məni susdurmaq, əks təqdirdə həbs etdirməkdir”.

7GUN.AZ