Siraqəddin Cabbarov sosial şəbəkələrə qadağa qoyub

Saatlıda məmur özbaşınalığı izaholunmaz həddə çatıb. Rayonda polis rejimi və komendant saatı elan edən icra başçısı Siraqəddin Cabbarov və polis rəisi Cəbrayıl Vəliyev sosial şəbəkələrə də qadağa qoyublar. Bu barədə 7GUN.AZ xəbər portalına Saatlı rayonundan məlumat daxil olub. Məlumatda bildirilir ki, icra başçısı rayondakı problemlər barədə mediaya informasiya ötürməməyi tapşırıb. Bu səbəbdən rayonda fəaliyyət göstərən bir neçə internet klub sahibinə də xəbərdarlıq edilib ki, vəziyyəti nəzarətdə saxlasınlar. Qeyd edək ki, bir neçə gün bundan öncə 7GUN.AZ xəbər portalının Saatlı rayonu üzrə bölgə müxbirinin hədələnməsi də bu planın tərkib hissəsidir. Bildirilir ki, rayonda qanunsuzluq və özbaşınalıq günü-gündən artır. Bütün bu qanunsuzluqların, maxinasiyaların başında isə şəxsən icra başçısı Siraqəddin Cabbarov özü durur. Mənbə bildirir ki, icra başçı və ətrafındakılar sel daşqınları zamanı ayrılan yardımları mənimsədikləri üçün rayonda gərginlik yaşanır. Bu səbəbdən icra başçısı istənilən etiraza və şikayətə sərt münasibət bildirir.
Qanunsuzluqların və ədalətsizliyin başında icra başçısının dayandığını iddia edən vətəndaşlar bildirirlər ki, mətbuatın və ictimaiyyət nümayəndələrinin etirazlarına baxmayaraq, Siraqəddin Cabbarov və ətrafı öz qanunsuz hərəkətlərinə son qoymaq niyyətindən əl çəkmək istəmirlər. Ona görə də Saatlıda narazılıqlar yeni etiraz aksiyalarının keçirilməsi həddinə çatıb. Onu da qeyd edək ki, bir müddət öncə burada narazılıqların etirazlara çevrilməsi məmurların sakinlərin, daha doğrusu, zərərçəkmişlərin hüquqlarını pozmasını bir daha göstərdi. Bunu Saatlıda yaşanan problemlər də sübut edir. Bir daha qeyd edək ki, Siraqəddin Cabbarovun apardığı ayrı-seçkilik fəaliyyətin nəticəsidir ki, burada vətəndaş-məmur qarşıdurması daha da kəskinləşir.
Qarşı tərəfin də mövqeyini dərc etməyə hazırıq.

7GUN.AZ