Masallı rayon sakinləri icra başçısını nədə günahlandırır?

Masallı rayonun bir qrup sakini 7GUN.AZ xəbər portalına şikayət məktubu ünvanlayıb. Şikayətdə bildirilir ki, Qəzənfər Ağayev rayona icra başçısı təyin olunduqdan sonra Masallının problemləri daha da artıb. Məktubu olduğu kimi təqdim edirik:

“Hörmətli redaksiya!
Bir neçə ildir ki, Qəzənfər Ağayev Masallı rayonuna rəhbərlik edir. Bu illər ərzində rayonda sosial problemlər artıb. Tikinti işləri altında böyük pullar mənimsənilir. Ola bilər ki, dediklərimizə inanmayacaqsınız. Onda gəlib rayonda araşdırma aparın. İcra başçısı rayonu savadsız və azğın məmurlara tapşırıb. İcra nümayəndələrinin çoxu adicə bir arayışı düzgün yaza bilmir. Bələdiyyə sədrlərinin isə çoxu orta və ya orta ixtisas təhsilli şəxslərdir. Ötən il rayonun “Telekommunikasiya” qovşağında partlayış baş verdi. Məlum oldu ki, burada qızıl və platindən olan keçirici başlıqlar çıxarılaraq satılıb, qovşaq da yüksək gərginliyə tab gətirməyib. Bu qurumun rəhbəri Əmanət Əzizovun isə ali təhsili yoxdur. Ancaq buna baxmayaraq o, strateji əhəmiyyətə malik bir quruma rəhbərlik edirdi. Masallıda təkcə təhsil və səyiyyə şöbələrində ildə 100 min manat pul mənimsənilir. Bu şöbələrdə çalışanlar – müəllim və tibb işçiləri hər ay həmin şöbələrin həmkarlar təşkilatlarına azından 1 AZN köçürürlər. Masallıda 5000 mindən çox müəllim və tibb işçisi var. Bu rəqəm ildə 60 min manata çatır. Amma ildə 10 müəllim və həkimə yardım edilmir. Bu il Masallıda 3 müəllimə həmkarlar təşkilatı pul ayırıb. Bu da 50-60 manat civarındadır. Bəs bu 60 min manat pul hara gedir? Hətta müalicəyə gedən müəllimlərə 50 manatlıq putyovkalar 150-200 manata satılır. Hələ digər təşkilatlarda yığılan pulları da buraya qatsaq, görün nə boyda rəqəm alınacaq.
Hörmətli redaksiya, bütün bunların arxasında şəxsən icra başısı Qəzənfər Ağayev dayanır. Bu adam heç kimdən və heç nədən çəkinmir. Hansısa qüvvələrə arxalanan Qəzənfər Ağayev rayonu fəlakətə sürükləyir, buna görə daşıdığı məsuliyyətin də fərqinə varmır. Əgər rayonda baş verənləri sadalasaq, onda gərək bütün günü Qəzənfər Ağayevin rayona vurduğu zərbələrdən danışaq.
Masallıda rüşvətxorluq və məmur özbaşınalığı dözülməz bir səviyədədir. Elə bir təşkilat yoxdur ki, orada rüşvət almasınlar. Masallının rayonu Mərkəzi Xəstəxanasında pul verməyən xəstəni müalicə etmirlər. Dərmanlar pulla, həm də baha qiymətə satılır. Dövlət vərəm xəstələrinə pulsuz dərman ayırır. Vətəndaşlar onu pulla alırlar. Qəzənfər Ağayev isə şikayətlərə baxmır. Bu biabırçılıqlara nə vaxt son qoyulacaq?
Yenicə çəkiləcək yollara görə ayrılan pullar da icra başçısı və məmurlar tərəfindən mənimsənilir. Əkin sahələrinə görə ayrılan subsidiyalar zamanı maxinasiyalara yol verilir. Torpağı istifadəsiz qalan və əkilməyənlərə kənd icra nümayəndələri saxta yolla pul yazırlar. Bu pulların 50 faizini isə razılaşdırılmış şəkildə özlərinə götürülər. Rayonda torpaq sahələri planlı şəkildə satılır. Bu gün rayonda heç kəs icra başçısından razı deyil, hamı onun vəzifəsindən uzaqlaşdırılmasını tələb edir. Sakinləri icra başçısının qanunsuz hərəkətləri, sahibkarları çökdürən addımları barədə dəfələrlə ölkə başçısına və aidiyyəti qurumlara az qala tonlarla şikayət məktubları ünvanlayıblar. Lakin sakinlərin şikayətlərinə baxmayaraq, Qəzənfər Ağayev hələ də layiq olduğu cəzanı almayıb.
Hörmətli redaksiya, bundan sonra da sizə bir neçə məktub ünvanlayacağıq. Xahiş edirik ki, şikayət məktublarımızı saytınızda işıqlandırasınız”.

Dərin hörmətlə: Masallı rayon sakinləri

Redaksiyadan: Qarşı tərəfin də mövqeyini və burada səsləndirlən fikirlərə münasibətini dərc etməyə hazırıq.