Filialın direktoru İsa Veyisov hər ay müəllim və tələbələrdən pul yığdırır

Azərbaycan Müəllimlər İnstitutunun filiallarında rüşvətxorluq halları tüğyan edir. Bu filialların içərisində “rüşvətyığma yarışması”nda birinci yeri Qazax filialı tutur. Bu barədə 7GUN.AZ xəbər portalına müəllimlər İnstitutunun Qazax filialından məlumat daxil olub. Məlumatda bildirilir ki, filialın direktoru İsa Veyisov hər ay müəllim və tələbələrdən pul yığdırır. Bununla yanaşı, təhsil müəssisəsində təhsilin aşağı səviyyədə olması, qanusuz köçürmələr və digər qeyri-qanuni hallar da mövcuddur. Mənbə direktorun müavinlərinin də qanunsuz əməllərlə məşğul olduğu, tələbələrin təqaüdünün mənimsənilməsi, institutda işləməyən şəxslərin adlarına əməkhaqqı yazıb əlavə qazanc əldə etdiyi haqda da məlumat verir.
Müəllimlər İnstitutunun Qazax filialında rüşvətxorluq və korrupsiyanın izaholunmaz bir halda olduğunu deyən mənbə bildirir ki, tələbələr də bu haqsızlıqdan narazıdırlar. Çünki oxuyub-oxumamsından asılı olmayaraq, hamıdan rüşvət alınır. Burada qiymətləndirmə “Boloniya təhsil sistemi”nə əsaslanır və şərti olaraq qiymət kitabçasına “3” 30 manata, “4” 40 manata, “5” isə 50-60 manata yazılır.
Məsələ ilə bağlı Müəllimlər İnstitutunun Qazax filialınin direktoru İsa Veyisov və ya hər hansı bir rəsmi nümayəndəsi ilə əlaqə saxlamağa çalışdıq. Təəssüf ki, İsa Veyisovu yerində tapa bilmədik. Mövzu ilə bağlı araşdırmalarımız davam edir. Qarşı tərəfin də mövqeyini dərc etməyə hazırıq.

7GUN.AZ