“O, məndən 500 manat rüşvət tələb etdi”

Nəsimi rayon Qaz İstismar İdarəsində özbaşınalıq və qanunsuzluq hökm sürür. Əhaliyə divan tutan idarə işçiləri heç bir xəbərdarlıq etmədən gah vətəndaşları qanunsuz yerə cərimələyir, gah da qaz xətlərini kəsirlər. Qeyd olunan sahədə baş verən özbaşınalıq və hərc-mərclik artıq bu gün Nəsimi rayonunda ciddi narazılıq doğurub. Belə ki, qaz idarəsinin əməkdaşları Nəsimi rayon Hüseynbala Əliyev 9 ünvanında yerləşən obyekt və mənzillərdə heç bir xəbərdarlıq etmədən qaz xətlərini kəsiblər. Belə bir problemlə 24saat.az saytının və “Politpress” qəzetinin rəhbəri Sudef Məcidov qarşılaşıb.
Bu barədə 7GUN.AZ xəbər portalına Sudef Məcidov özü məlumat verib. Hətta Qaz İdarəsinin rəisi sözügedən media orqanlarının rəhbərindən 500 manat rüşvət tələb edib: “Problem yarananda idarənin rəisi ilə danışdım. O, məndən 500 manat rüşvət tələb etdi. Pulu ödəcəyim təqdirdə qaz xəttini kəsməyəcəyini dedi. Mən ona 24saat.az xəbər portalının və “Politpress” qəzetinin rəhbəri olduğunu dedim. Bundan sonra rəis bildirdi ki, qaz xətti kəsiləcək. Ya pulu ödəyin, ya da dediyimiz məbləğlə razılaşın. Biz media nümayəndəsi olduğumuzu yenidın xatırlatdıq. Bu zaman rəis qısa bir cavab verdi ki, gedin, əlinizdən nə gəlirsə, edin”.
Sudef Məcidov bildirir ki, əslində bildirişdə borcun ödənməsinə görə abunəçiyə 3 gün vaxt verilir. Bunların isə məqsədi sadəcə abunəçinin üzərinə getmək, onu bir az da olsa qorxutmaq və ondan göstərilən məbləği qoparmaqdır.
Nəsimi rayonu Hüseynbala Əliyev 9-da yaşayan şikayətçilər bildirirlər ki, rayonun Qaz İdarəsi dəfələrlə bu cür qanunsuzluqlara yol verib. Hətta yeni sayğaclaşma prosesi zamanı abunəçilərdən əlavə pullar qoparıb.
Sakinlər Neft Şirkətinin prezidenti Rövnəq Abdullayeva müraciət edərək bildirirlər ki, bu qanunsuzluğa görə müvafiq tədbirlər görülsün. Məsələyə sözügedən media orqanlarının əməkdaşları da etiraz edir, problemin bu yolla həll olunmasını düzgün saymırlar. Onlar bildirilər ki, bu gün ölkənin müstəqilliyinin 20-ci il dönümü qeyd olunur. Amma Nəsimi rayonunda bir qrup sakin qazsız qalıb. Belə çıxır ki, “Azəriqaz” ASC bu addımı atmaqla xalqın bayramını özünəməxsus tərzdə təbrik edib. Bunun başqa bir adı yoxdur.

7GUN.AZ