Bölgədə durumun ciddi olduğunu deyən mənbə bildirir ki, bununla bağlı aidiyyəti qurumlara və ölkə rəhbərliyinə də müraciət ediləcək

Qarşıdan gələn ilin yaz aylarında Kür çayında növbəti daşqınların olması gözlənilir. Bu barədə 7GUN.AZ xəbər portalına daxil olan məlumatda bildirilir. Məlumatda o da vurğulanır ki, Kürdə bəndlərin təmiri üçün ayrılmış vəsaitlərin mənsənilməsi faktları mövcuddur. Xəbərdə həmçinin, Kürqırağı ərazilərə bəndlərin vurulması və çayın deltasının təmizlənməsi prosesinin başa çatdırılmadığı da söylənilir. Burada maxinasiyaların və korrupsiya hallarının olduğunu deyən mənbə bildirir ki, “Meliorasiya və Su Təsərrüfatı” Açıq Səhmdar Cəmiyyətinin sədri Əhməd Əhmədzadə ötən il baş vermiş sel daşqınlarından heç bir nəticə çıxarmayıb. Hətta bir müddət öncə onun Prezident Administrasiyasına çağırılması və ondan 2010-cu ilin yazında baş vermiş Kür daşqınlarının nəticələrinin aradan qaldırılması ilə bağlı ötən il iyulun 9-da Nazirlər Kabineti tərəfindən imzalanmış 197 saylı sərəncamın hesabatının istənilməsi barədə məlumatlar yayılmışdı. Ancaq bütün bunların fonunda Əhməd Əhmədzadə fəaliyyətində heç bir dəyişiklik etməyib. Bölgədə durumun ciddi olduğunu deyən mənbə bildirir ki, bununla bağlı aidiyyəti qurumlara və ölkə rəhbərliyinə də müraciət ediləcək. Mövzunu diqqətdə saxlayacağıq.

7GUN.AZ