Xuraman Rüstəmova Raisa İsgəndərovanın yaxınlarını niyə işdən azad edir?

Beyləqan rayonundan 7GUN.Az xəbər portalına maraqlı bir məlumat daxil olub. Məlumatda bildirilir ki, rayonda baş verənlər burada bir sıra sahələrdə bəzi məmurların qanunlar deyil, qaydalarla işlədiklərini göstərir. Məsələn, maliyyə şöbəsinin müdiri Məhəmmədəli Kərimov bir necə aydır işdən çıxarılıb. Lakin bu günə kimi onun yerinə hələ heç kim təyin edilməyib. Maliyyə şöbəsi rəhbəri vəzifəsinin sahibsiz qalmasının səbəbi bu post uğrunda bəzi yerli məmurların mübarizə aparması, habelə rayon İcra Hakimiyyətinin rəhbəri İrşad Əliyevin məmurlar arasında seçim etməkdə çətinlik çəkməsidir.Ümumiyyətlə isə, rayonda kompromat savaşı təkcə kişilər arasında deyil, həm də qadınlar arasında da getdikcə qızışır.
Beyləqan şəhər 3 saylı orta məktəbin direktoru Xuraman Rüstəmova ilə RİH başçısının təhsil, səhiyyə, mədəniyyət üzrə müavini Raisa İsgəndərova arasında gedən “səssiz müharibə”nin artıq qurbanları da var.
Beyləqan rayon sakini SMD-42 qəsəbəsində yaşayan Mehralıyeva Rahilə Yusif qızı yazır ki, İctimai-İaşə Birliyinin 16 mart 1987 –ci il tarixli , 44 saylı əmri ilə 3 saylı məktəbidə yerləşən 97 nömrəli bufetə bufetçi təyin edilib. 1992-ci ildə bufet müvəqqəti olaraq məcburi köçkünlər tərəfindən zəbt olunduğuna görə həmin dövrdə sabiq direktor Hədis Allahverdiyevin imzası ilə bufet məktəbin həyətindəki dəmir köşkə köçürülüb. Məktəbli ləvazimatı və şirniyyat orda satılıb.
Sonradan məktəb abadlaşdırılıb , yenidən tikilib. Yeni direktor Xuraman Rüstəmova təyin ediləndən sonra Rahilə xanımın problemləri başlayıb. Direktordan təsadüfən əmək kitabçasını alan bufetçi xanım görür ki, 01.012011-ci ildə əmrlə xadimə kimi guya işə qəbul olunub. Halbuki, 01 yanvar təqvimdə heç iş günü deyil. Həmçinin digər əmrlə X. Rüstəmova Rahilə xanımın həyat yoldaşı Məharət Eyvazovu 01 noyabr 2010-cu ildə məktəbdə dalandar vəzifəsinə təyin edib. Ancaq onların heç birinin bu əmrlərdən xəbəri olmayıb. O cümlədən 2011-ci il yanvar, fevral, mart ayında xadimə kimi Rahilə Mehralıyevanın, noyabr 2010-cu ildən aprel 2011-ci ilədək Məharət Eyvazovun adına dövlətdən alınmış əmək haqlarından şikayətçilərin xəbəri olmayıb.Beyləqan şəhər İcra nümayəndəliyinin vermiş olduğu bankomat kartı kimin imzası ilə qol çəkilib götürülməsi məlum deyil. Rahilə Mehralıyavanın bu faktla bağlı Beyləqan Rayon Prokurorluğuna hələ iyun ayında müraciət etməsi də cavabsız qalıb. Belə ki, işi araşdıran ədliyyə müşaviri Feyzulla Qasımov bəhanə ilə cinayət işini başlamaqdan imtina edib. Halbuki korrupsiya faktları bu işdə danılmaz idi. Məsələ ondadır ki, Xuraman Rüstəmovanın dayısı oğlu, əvvəllər Daşkəsəndə prokuror işləmiş Yusif Qocayev hazırda Füzuli Hərbi Məhkəməsində dövlət ittihamçısıdır. Və Feyzulla Qasımova müəyyən dərəcədə təsir edir. Əvəzində Xuraman Rüstəmova Rahilə Mehralıyevanı tamamilə məktəbdən və bufetdən uzaqlaşdırıb. Hazırda məktəbin bufetini direktorun öz oğlu, təsərrüfat müdiri isə doğma qardaşıdır. Şikayətçi qadının incidilməsinin bir səbəbi də onun Raisa İsgəndərova ilə yaxın olmasıdır. Xuraman Rüstəmova rayonda özünə yaxın media nümayəndələrinə xanım İsgəndərova ilə bağlı dəfələrlə komromat ötürüb. Və Raisa İsgəndərovanın RİH Aparatında vəzifəyə gəlməmişdən əvvəl rəhbərlik etdiyi Beyləqan rayon Uşaq Yaradıcılıq Mərkəzində guya dəfələrlə qalmaqallar törətdiyi barədə söhbətlər yayıb. Halbuki, Xuraman Rüstəmovanın özünün bir zamanlar müəllim yoldaşlarına xəsarət yetirməsi, hətta birinin üstünə qaynar su tökməsi barədə rayon əhalisinin hamısı xəbərdardır...

Yazıda adı çəkilən şəxslərin də mövqeyini dərc etməyə hazırıq.

7GUN.AZ