Rayon ərazisində qaz və işıq iki gündür ki, tamam kəsilib



İcra başçısı İsmayıl Vəliyev isə bayram keçirmək üçün Bakıya gəlib

Neftçala rayonunda sosial böhran yaşanır. Rayon sakinlərinin Bizimxeber.com-a verdiyi məlumata görə, rayonda iki gündür ki, qaz və elektrik enerjisinin verilməsi tamam dayanıb. Rayonun demək olar ki, əksər kənd və qəsəbələrində ciddi problemlər yaşanmaqdadır. Aidiyyatı qurumlar isə problemin həll olunmasında çətinlik çəkirlər. Zaman-zaman yığılıb qalan problemlərin vaxtında həll edilməməsi, üstəlik yeni rəhbərliyin və əsasən də icra başçısı İsmayıl Vəliyevin işə səriştəsiz yanaşması artıq problemin daha da dirinləşməsinə gətirib çıxarıb. Ən qəribəsi də odur ki, aidiyyatı qurumlar problemi həll etmək əvəzinə vəziyyətin normal olduğunu iddia edirlər. Məsələn, Neftçala Qaz İdarəsinin rəisi Pərviz müəllim deyir ki, elə də ciddi problem yoxdur. Onlarla kənddə və qəsəbədə problemin həll olunması istiqamətdə iş gedir: «Ərazi palçıqlı olduğu üçün texnikanın əraziyə aparılması mümkün deyil». Qəribə açıqlamadır. Nəzərə alsaq ki, qış indi başlayıb və qarşıda qar yağacaq, onda belə çıxır ki, problem bu il də həll olunmayacaq. Çünki, bu problem illərdə rayonda hökm sürür və onun həlli hələlik mümkün deyil. Ən qəribə açıqlamanı isə icra başçısı İsmayıl Vəliyevin sosial məsələlər üzrə müavini Nəriman müəllimdən gəldi. Neftçalada yaranan sosial böhranın səbəblərini, işıq və qaz probleminin hansı səbəbdən yarandığını soruşduqda aldığımız cavab bu oldu: «Yalandı, Neftçalada qaz da var, işıq da. Yalan danışırlar».
Bundan sonra bizim konkret faktlarımız qarşısında çıxılmaz vəziyyətdə qalan Nəriman müəllim problemin bir neçə kənd və qəsəbədə yaşandığını demək məcburiyyətində qaldı. Bir qədər sonra isə rayondakı ağacların kökündən çıxdığını və başlarının bu kimi problemlərin həllinə qarışdığını deyən Nəriman müəllim çıxış yolu tapmaq üçün nə gəldi dedi:«Bilirsiz, biz problemləri həll etməyə çalışırıq. Həll olunacaq». Fikir verirsinsə, Nəriman müəllim problemin varlığını gizlətməyə çalışdı, amma alınmadı.
Digər məsələ isə, rayonda qaz sayğaclarının quraşdırılmasıdır. Belə ki, sakinlər deyir ki, qaz sayğacları hər bir evə quraşdırılmalı olduğu halda bu baş vermir. Qaz İdarəsinin əməkdaşları və İcra hakimiyyətinin sosial məsələlər üzrə müavini Nəriman müəllimin adamları evbəev gəzərək sayğacların quraşdırılması məsələsində vətəndaşlara «məsləhətlər» verirlər. Məsləhət isə belədir: «Hər ay 40-50 manat ver, sənə sayğac quraşdırmayaq». Bununla razılaşmayanlara isə sayğaclar quraşdırılır. Ən qəribəsi odur ki, sayğaclar quraşdırılmayan mənzillərdə normal qaz var. Sayğacı olanlar isə donmağa məhkumdur. Bunun səbəbi də çox sadədir. Borularda qaz təzyiqi tamamilə olmadığı üçün sayğaclar işləmir və nəticədə mənzilə qaz gedib çıxmır.
Sayğacsız mənzillərdən yağılan 50 manat (lar) isə məlum məsələdir ki, ciblərə gedir. (Bu faktla bağlı dəqiq təfərrüatlar yaxın günlərdə qeyd olunacaq). Bir sözlə, Neftçala rayonunda ciddi problem yaşanır. Havaların soyuması və nəticədə qaz və işıq idarələrinin qışa hazır olmaması, qarşıda rayon sakinlərinin ciddi problemlərlə üzləşəcəklərini deməyə əsas verir. İcra başçısı İsmayıl Vəliyev isə qurban bayramını keçirmək üçün Bakıya, işıqlı və isti evinə gəlib. Rayon sakinləri isə soyuq mənzillərində müqəddəs bayramı belə keçirmək gücündə deyillər.

Soyuq və işıqsız mənzilindən bizə telefon açan rayon sakini demişkən - «Olsun, İsmayıl Vəliyevin etdiklərinin cavabını qarşıda gələn seçkilərdə verəcəyik. Bizə qaz, işıq və su verməsinlər, biz də seçkilərə getməyək. Əl əli yuyar, əl də üzü. Amma bizim donmuş əllərimiz bu dəfə nə İsmayıl Vəliyevin üzünü yuyacaq, nə də seçki bülletenlərini tutacaq».

Bizimxeber.com\Ədil Hüseynli