Kreditlərin 25 faizini dövlət büdcəsindən ayırmalar, 75 faizini isə geri qaytarılan vəsaitlər təşkil edib

Ötən il İqtisadi İnkişaf Nazirliyinin Sahibkarlığa Kömək Milli Fondunun fəaliyyəti tarixində ilk dəfə olaraq daha çox - 138 milyon manat güzəştli kredit verilib, 1643 sahibkar bu imkandan yararlanıb. Nazirliyin mətbuat xidmətindən verilən məlumata görə, verilmiş kreditlərin 25 faizini dövlət büdcəsindən ayırmalar, 75 faizini isə geri qaytarılan vəsaitlər təşkil edib. Güzəştli qaydada maliyyəşdirilən investisiya layihələrinin 75 faizi regionların, 25 faizi isə Bakı qəsəbələrinin payına düşür. Bu investisiya layihələrinin reallaşması 6500-dək yeni iş yerinin yaradılmasına imkan verəcək.

2011-ci ildə Sahibkarlığa Kömək Milli Fondu tərəfindən sahibkarlıq fəaliyyəti ilə məşğul olan 162 məcburi köçkünə 5,9 milyon manat güzəştli kredit ayrılıb. Fond tərəfindən ötən il verilmiş güzəştli kreditlərin 118 milyon manatı yeni texnologiyalara əsaslanan 85 istehsal, emal və infrastruktur layihəsinin icrasına yönəldilib. Güzəştli kreditlərdən istifadə olunmaqla, 2011-ci ildə 33 infrastruktur, istehsal və emal müəssisəsi fəaliyyətə başlamışdır. Bu il daha 96 belə müəssisənin istifadəyə verilməsi nəzərdə tutulur.

2011-ci ildə ölkənin regionlarında və Bakı qəsəbələrində 7 minədək sahibkarın iştirakı ilə təşkil edilmiş 34 tədbirdə güzəştli kreditlərin verilməsi ilə yanaşı, maarifləndirici treninqlər, nümunəvi investisiya layihələrinin təqdimatı keçirilib.

Ümumilikdə, Fondun fəaliyyəti dövründə 12,5 mindən çox sahibkara 720 milyon manatadək güzəştli kredit verilib. Güzəştli kreditlər hesabına maliyyələşdirilən layihələrin icrası 95 min yeni iş yerinin açılmasına imkan yaradır.