Azərbaycanın Şimal bölgəsində ət, un və ərzaq məhsulları ucuzlaşıb

Regionda 1 kiloqram mal ətinin qiyməti 7 manat, bir kisə unun qiyməti isə 13-16 manat arasında dəyişir. Bölgədəki bir sıra ərzaq məhsullarında ucuzlaşma müşahidə olunur. Bir kisə un bir neçə ay bundan öncə 20-21 manata satılırdısa, indi 13-16 manata təklif olunur. Un satışı ilə məşğul olan şəxslər bildirir ki, Azərbaycana idxal olunan taxılın qiymətinin ucuzlaşması unun da qiymətinə təsir göstərir.
Bundan başqa, Xaçmaz və Quba rayonlarında ətin mal ətinin qiyməti 1 manatadək ucuzlaşıb. Əvvəllər 1 kq mal əti 8 manata satılırdısa, hazırda alıcılar 1 kq mal əti üçün 7 manat ödəyir. Soğan və kartofun qiymətində də enmə müşahidə olunur. Satıcıların sözlərinə görə, 9-10 manata satılan 35 kq soğan kisəsinin qiyməti son bir ayda 7 manata düşüb.
İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin Quba-Xaçmaz Regional Şöbəsinin baş məsləhətçisi Nadir Hüseynov bildirib ki, unun qiymətinin enməsi yeni istehsalçıların yaranması ilə bağlıdır. “Mal ətinin qiymətinin aşağı düşməsi isə alıcılıq qabiliyyətinin zəif olması ilə əlaqədardır”.