Gəmilər Bakıya aprelin əvvəlində gətiriləcək

Bununla yanaşı, 2 gəzinti gəmisi də sifariş edilib. Dənizkənarı Bulvar İdarəsi sərnişinlərə xidmət göstərmək üçün 3 yeni gəmi sifariş edib. Gəmilərin 2-si gəzinti, 1-i isə restoran-gəmi kimi fəaliyyət göstərəcək. İdarənin rəisi Nazim Məcidov bildirib ki, ilk dəfə istismara veriləcək restoran-gəmi 80 nəfər üçün nəzərdə tutulub.

45, 60 nəfərlik tutuma malik gəzinti gəmiləri isə sakinləri 2 istiqamətdə-Saat Qülləsindən Bayraq Meydanı və Zığ istiqamətində gəzintiyə çıxaracaq. Ancaq bunun üçün bir qədər gözləməli olacağıq. Belə ki, soyuq hava şəraiti ilə əlaqədar gəmilərin paytaxta gətirilməsi yubanır.
Belə gəmilərdə gəzintiyə çıxmaq isə 2-3 manatdan baha olmayacaq. Bulvar ərazisinin genişləndirilməsi və tələbatdan asılı olaraq gələcəkdə gəmilərin sayı artırıla bilər. Nazim Məcidov onu da deyib ki, 4-7 kilometr məsafəni əhatə edəcək bulvarın Novruz bayramınadək hazır olacağı gözlənilir.