Ölkə iqtisadiyyatına yönəldilən vəsaitlərin artım tempinə görə MDB-də liderik

Ölkə iqtisadiyyatına yönəldilən investisiyaların artım tempinə görə Azərbaycan Müstəqil Dövlətlər Birliyinə (MDB) daxil olan ölkələr arasında ilk sırada qərarlaşıb. Bu barədə məlumat MDB Dövlətlərarası Statistika Komitəsi tərəfindən açıqlanıb. Komitənin məlumatında bildirilir ki, 2010-cu illə müqayisədə ötən il Azərbaycanda əsas kapitala yönəldilən vəsaitlərin həcmi 27,3% artıb.

Məlumatda həmçinin qeyd olunur ki, ötən il MDB-yə üzv olan ölkələr arasında yalnız Ermənistan və Qırğızıstanda əsas kapitala yönəldilən vəsaitlərin həcmi azalıb. Azalma Ermənistanda daha çox olub. 2011-ci ildə Ermənistan iqtisadiyyatına yatırılan sərmayələrin həcmi 2010-cu illə müqayisədə 11,5% azalıb. Qırğızıstanda isə bu göstərici 6,6% təşkil edib. Digər ölkələrə gəldikdə isə, qeyd edək ki, investisiyaların artım tempi Türkmənistanda 23,2%, Ukraynada 21,2%, Belarusda 13,3%, Moldovada 11,3%, Özbəkistanda 7,9%, Rusiyada 6,2%, Tacikistanda 5%, Qazaxıstanda isə 2,4% səviyyəsində olub.

Ermənistan işsizlərin sayına görə liderdir

Birliyə üzv olan ölkələr arasında işsizlərin sayına görə isə ilk sırada Ermənistan qərarlaşıb. Ötən il bu ölkədə işsiz kimi qeydiyyata alınan insanların sayı 69,4 min nəfər olub. Bu isə iqtisadi fəal əhalinin 5,9%-nə bərabərdir. Bu barədə məlumat MDB Dövlətlərarası Statistika Komitəsi tərəfindən açıqlanıb. Komitənin məlumatında bildirilir ki, 2011-ci ildə Azərbaycanda qeydiyyatda olan işsizlərin sayı 38,3 min nəfər olub ki, bu da iqtisadi fəal əhalinin cəmi 0,8%-ni təşkil edir. MDB-də ən aşağı işsizlik səviyyəsi Qazaxıstan və Belarusda qeydə alınıb. Bu ölkələrdə işsiz statusu alan insanların sayı müvafiq olaraq, 36,6 və 28,2 min nəfər olub. İqtisadi fəal əhalinin sayına nisbətdə bu göstərici Qazaxıstanda 0,4%, Belarusda isə 0,6% təşkil edib. Birliyə üzv olan digər ölkələrə gəldikdə isə, komitədən bildirilir ki, Ermənistandan sonra ən çox işsiz Moldova və Tacikistanda qeydə alınıb. Moldovada iqtisadi fəal əhalinin 2,9%-i və 38,8 min nəfər, Tacikistanda isə 2,6%-i və 55,5 min nəfər işsizdir. Bu göstərici Qırğızıstanda 2,5%-ə (61,1 min nəfər), Ukraynada 2,4%-ə (482,8 min nəfər), Rusiyada isə 1,7%-ə ( 1,28 milyon nəfər) bərabər olub.