Natiq Abbasov: “Azərbaycan Avropa və dünya bazarlarına gün ərzində 750-800 min barel xam neft çıxarır”

Bu gün Bakıda GUAM Parlament Assambleyası ilə Baltik Assambleyasının “Sərhədlər üzərindən əlaqələrin qurulması" adlı birgə beynəlxalq konfransı keçirilib. Konfransda çıxış edən Azərbaycan Sənaye və Energetika nazirinin müavini Natiq Abbasov ölkənin neft-qaz sənayesində əldə etdiyi nailiyyətlərdən danışıb. O, bildirib ki, Azərbaycan neft-qaz ölkəsi olmaqla yanaşı, yaxın illərdə alternativ enerji mənbələrindən geniş istifadə edən ölkələr sırasına daxil olacaq.

Onun sözlərinə görə, Azərbaycanda 800 meqavat külək, 1500-2000 meqavat günəş, kiçik su elektrik stansiyalarının inşasına imkan verən potensial var: “Azərbaycan Avropa və dünya bazarlarına gün ərzində 750-800 min barel xam neft çıxarır. Azərbaycan GUAM üzvü olan ölkələri, Baltikyanı zonanı və Avropanın digər dövlətlərini əhatə edən enerji dəhlizlərində neft-qaz strukturunun və elektrik verilişi sistemlərinin gücləndirilməsi istiqamətində bir sıra layihələrin həyata keçirilməsində və dəstəklənməsində fəal iştirakçıdır".
Nazir müavini onu da qeyd edib ki, Avropa İttifaqı ilə Azərbaycan arasında enerji sahəsində yaranmış sıx əməkdaşlıq bu prosesə GUAM (Gürcüstan, Ukrayna, Azərbaycan, Moldova), Baltik Assambleyası (Litva, Latviya , Estoniya), Benilüks Parlamenti (Belçika, Niderland, Lüksemburq), Şimal Şurası (Danimarka, İslandiya, NOrveç Finlandiya, İsveç), Vişeqrad qrupu (Polşa, Çexiya, Slovakiya, Macarıstan) ölkələrini də cəlb edir.

(TREND)