Ölən və yaralananlar bir ailənin üzvləri olub

Bu gün günorta saatlarında Kürdəmir rayonu ərazisində dəhşətli yol qəzası baş verib. Kürdəmir Rayon Polis İdarəsinin Cinayət Axtarış bölməsinin rəisi Nizami Abbasovun ANS PRESS-ə verdiyi məlumata görə, hadisə Kürdəmir-Ağsu yolunun 30-cu kilometrliyində, Atakişili kəndi yaxınlığında baş verib. Belə ki, “VAZ 2107” markalı 10 MN 840 dövlət nömrə nişanlı avtomobil ilə “KamAZ” markalı 22 BF 239 dövlət nömrə nişanlı yük maşını toqquşub. Hadisə nəticəsində "Jiquli"nin sürücüsü, 1960-cı il təvəllüdlü Mahir Mikayıl oğlu Mürsəlov və onun bacısı Ədibə Mikayıl qızı Babayeva ölüb, 3 sərnişin isə ağır vəziyyətdə xəstəxanaya aparılıb.

Yaralanan şəxslər Mürsəlova Ayşən Mikayıl qızı, Mürsəlova Güldanə Mahmud qızı və Mürsəlova Nazilə Əlihüseyn qızıdır.

İlkin araşdırmalara görə, hadisənin baş verməsinə “VAZ 2107” markalı maşının ötmə əməliyyatını düzgün yerinə yetirməməsi səbəb olub. Faktla bağlı araşdırma aparılır.