Onlar İlyas Vahabovu üzərindəki xeyli miqdarda pulu ələ keçirmək üçün öldürüblər

Məlum olduğu kimi, bu ilin sentyabrın 19-da, saat 21.30 radələrində Sumqayıt şəhəri, 36-cı məhəllə, ev 11/5, mənzil 23-də yaşamış 1966-cı il təvəllüdlü Vahabov İlyas Abbas oğluna yaşadığı binanın qarşısında naməlum şəxslər tərəflndən bıçaqla qətlə yetirildi. Sentyabrın 20-də isə Sumqayıt şəhər prokurorluğunda Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıldı.
Respublika Baş Prokurorluğundan 7GUN.AZ portalına verilən məkumata görə, Daxili İşlər və Milli Təhlükəsizlik nazirliklərinin, Baş Prokurorluğun, Sumqayıt şəhər prokurorluğu və Sumqayıt şəhər Polis İdarəsinin birgə həyata keçirdikləri intensiv, təxirəsalınmaz istintaq hərəkətləri və əməliyyat-axtarış tədbirləri nəticəsində ağır cinayəti törədən şəxslərin kimliyi məlum olub. Onlar, Bakı şəhər sakinləri - 1997-ci il təvəllüdlü Səlimbəyli Vaqif Etibar oğlu və 1993-cü il təvəllüdlü Əbilov Anar Cavanşir oğludurlar.
İstintaqla müəyyən edilib ki, Vaqif Səlimbəyli İlyas Vahabovun işlədiyi valyutadəyişmə məntəqəsindən evinə gedərkən üstündə pul apardığını biliblər. Onlar pulu ələ keçirib aralarında bölüşdürmək üçün birgə razılığa gəliblər və sentyabrın 19-da saat 21:30 radələrində İlyas Vahabovun yaşadığı ünvana gələrək pusquda dayanıb onu gözləyiblər.
Mərhum dalana daxil olarkən Vaqif Səlimbəyli özü ilə gətirdiyi və silah qismində istifadə etdiyi bıçaqla İ.Vahabova dalbadal iki zərbə vurub. Aldığı xəsarətlərdən İ.Vahabov ertəsi gün xəstəxanada ölmüşdür.
Vaqif Səlimbəyli və Anar Əbilov törətdikləri hərəkətlərə görə Cinayət Məcəlləsinin 120.2.1-ci maddəsi ilə təqsirləndirilən şəxs qismində cəlb edilməklə barələrində Sumqayıt şəhər məhkəməsinin qərarı ilə həbs qətimkan tədbiri seçilib.
Hazırda cinayət işi üzrə istintaq davam etdirilir.

7GUN.AZ