İyulun 14-18-də Azərbaycanda ilk dəfə olaraq Quba rayonunun Qalaxudat kəndinə yaxın ərazidə “Qızıl Qaya-2010” beynəlxalq dağ idmanı festivalı keçiriləcək.

Bu barədə 7 gün.az-a Azərbaycan Hava və Ekstremal İdman Növləri Federasiyasının mətbuat xidmətindən məlumat verilib.

Festival Azərbaycan Hava və Ekstremal İdman Növləri Federasiyasının təşkilatçılığı və Qərb Universitetinin dəstəyi ilə təşkil olunur.

Proqramda boulderinq yarışlarının keçirilməsi, Şahdağ silsiləsində yerləşən “Heydər zirvəsi”nə sürətli yürüşün təşkili, müxtəlifliyi sevənlər üçün uzunluğu 1 kilometrdən çox, hündürlüyü 200-300 metrə yaxın olan toxunulmayan qaya divarlarına dırmanmaq və digər tədbirlər nəzərdə tutulub.

Bu tədbirdə Azərbaycan Hava və Ekstremal İdman Növləri Federasiyasının 20 klubunun (Bakı şəhəri və o cümlədən regionlarından Qusar, İsmayıllı, Qax, Gəncə, Daşkəsən, Qobustan rayonlarından) 100-dən çox idmançıları və Azərbaycan Alpinizm Federasiyasının nümayəndələri ilə birgə eyni zamanda Rusiya, Gürcüstan və Macarıstandan da idmançılar iştirak edəcəklər.

Festivalın keçiriləcəyi bütün ərazi, dar dərələri ilə, toxunulmayan, qarmaq belə vurulmayan qaya divarları ilə zəngindir. Geniş mədəni proqramı olan festival qeyri-rəsmi ünsiyyət, tanışlıq və müxtəlif ölkələrdən olan idmançılara təcrübə mübadiləsi aparmaq üçün imkanı verəcək.

Qeyd edək ki, Azərbaycan Hava və Ekstremal İdman Növləri Federasiyasının prezidenti ekologiya və təbii sərvətlər naziri Hüseyn Bağırovdur.