Bəzi mübahisəli məsələlər heç köhnəlmir. Bütün zamanların insanları onları ilk dəfə müzakirə edirmiş kimi alovlu şəkildə müzakirə edirlər

Pul ilə xoşbəxtlik arasındakı əlaqə də belə mövzulardandır. Nəticə? Bəli, pul xoşbəxtlik gətirir. Amma yalnız doğru xərclənərsə.

“Azadinform” “Cosmopolitan” xəbər verir ki, araşdırmalar göstərib ki, insanları xoşbəxt edən “almaq” yox, “düzəltmək”dir. Onsuz da özünü yaxşı hiss edən insan puldan da səmərəli istifadə edir. Bu məsələdə ortadakı digər bir sual - pul xoşbəxtlik yaradır, yoxsa xoşbəxtlik pul gətirir?

Ayaqqabı, çanta, paltar, kürk və s. nə aldığınızın fərqi yoxdur. Ehtiyacınız olmadığı halda gözünüz parıldayaraq aldığınız şeylər əslində, heç bir boşluğu doldurmur. Çünki aldığınız nə qədər bahalı və ya zövqlü olursa-olsun, onun həyatınızdakı həyəcanı qarderobunuzdakı köhnəlmiş dostlarının yanına asılana qədərdir. Sonra hər şey normala qayıdır. Bu halda xoşbəxt olan siz yox, mağaza sahibləridir. Yaşadığınız yarım saatlıq bu fərqli hissin adı xoşbəxtlikdirsə, niyə belə ötəridir? Və ya əgər xoşbəxtliyin səbəbi puldursa, niyə kirayədə yaşayan qonşunuz sizdən daha xoşbəxtdir? Həm də bir çox araşdırma da sübut edib ki, əsas ehtiyaclarını tam qarşılaya bilən, pis-yaxşı qırağa bir miqdar pul qoya bilənlərlə milyonları olanların xoşbəxtlik hissi arasında heç bir fərq yoxdur.

Beləliklə, pul ilə xoşbəxtlik arasındakı əlaqəni açmağa yönəlmiş araşdırmanın nəticələri göstərib ki, pul metala, paltara, əşyaya, zinətə yox, xəyalları gerçəkləşdirməyə, unudulmaz xatirələr toplamağa, başqalarına kömək etməyə xərclənəndə insana əvəzolunmaz xoşbəxtlik gətirir. ABŞ-ın Kornvell Universitetində aparılan araşdırma papaq yerinə kino biletinə, bahalı çanta əvəzinə səyahət biletinə xərclənən pulun daha uzunmüddətli xoşbəxtliyə açar olduğunu göstərib.

Harvard Universitetinin sosial psixologiya üzrə mütəxəssisi Dan Gilbert isə “Stumbling on Happiness” kitabında bunu belə izah edir: “Xatirələr yada düşdükcə yaşandıqları andakından daha şirin gəlir. İnsana yaşandığı andakından daha böyük xoşbəxtlik verir. Aralarında neqativ olanları silirik. Xoşumuza gələnləri parıldadırıq. Yaşananlar çox daha subyektivdir. Ondan daha gözəl nəsə ala bilmək, sadəcə, mümkün deyil”.

milli az