İcra başçısı Qəzənfər Ağayevin əməllərindən bezən daha 100 ailə etiraza qoşulacaq

Bölgələrdə sosial narazılıqlar partlayış həddinə çatıb. Bu dəfə də Masallı rayonunda etirazlar baş qaldırıb. Dünən Masallı Ziyalıları İctimai Birliyinin üzvləri rayonun icra başçısı Qəzənfər Ağayevin özbaşınalıqlarına etiraz olaraq aclıq aksiyasına başlayıblar. Bazar günündən etibarən hər evdə aclıq aksiyası keçirilir. Rayon sakinlərindən aldığımız məlumata görə, aksiyaya 15 ailə qoşulub.

Qarşıdakı günlərdə daha 100 ailənin birliyin aksiyasına qoşulacağı gözlənilir. Aclıq edənlər bildiriblər ki, Qəzənfər Ağayev rayona rəhbərlik etdiyi gündən ancaq özü üçün pul yığmaqla məşğul olub.
Onlar bununla bağlı ölkə başçısına müraciət ediblər: “Şikayətlərimizə baxan yoxdur. Qəzənfər Ağayevə heç kəs heç nə demir. Ayrı yolumuz qalmır. Amma inanırıq ki, mətbuat vasitəsilə ölkə rəhbərliyi bu məsələdən xəbər tutacaq”.
Masallı ziyalılar rayonda büdcə vəsaitlərinin mənimsənildiyi, prezidentin ayırdığı vəsaitlərin təyinatı üzrə xərclənmədiyini bildiriblər. Adətən belə ittihamları müxalifətçilərin dilindən eşidirik.
Ancaq Masallı rayonunda bunu Ziyalılar Birliyi adlanan qurumun üzvləri də deyir. Bu birliyin üzvləri isə hakim Yeni Azərbaycan Partiyasının üzvləridir. Aksiyaçılar deyir ki, prezident bu rayonda olarkən onu aldadıblar: “Prezidentə deyilib ki, Masallı rayonunun Xırmandalı kəndinə su çəkilib. Halbuki kəmərin açılışında maşın vasitəsilə xəttə su buraxıblar. Amma camaat orda içməyə su tapa bilmir”.
Onu da əlavə ediblər ki, rayonda sahibkarlar təqib olunurlar: “Məhkəmələrdə çoxlu işlər var. Bəzi sahibkarların obyektləri əllərindən alınıb. Dükanımızı sökürlər dözürük. Prezidentin Masallı üçün ayırdığı pul hara getdiyi bilinmir, ona da dözürük. Birini döyürlər, qışqırır, deyirlər ki, qışqırma...”