Qənimət Zahid: “Qorxmaq istəyən adamlar özlərinə həmişə hansısa əsaslar tapırlar”


Son bir neçə ayda Azərbaycan ictimaiyyəti və media oxucuları bir çox maraqlı və taleyüklü hadisələrin şahidi oldu. Bu hadisələrin ən diqqətçəkəni Şimali Afrikada tüğyan edən və dünyanın siyasi tarixinə “Ərəb baharı” kimi düşən inqilablar idi ki, bu proseslərin ab-havası ölkəmizdən də yan keçmədi.
Bu ilin mart ayından ölkədə etiraz aksiyaları başladı. Kortəbii şəkildə baş vermiş aksiyaların bir mərkəzdən idarə olunmaması sonucda kütləvi həbslər və aksiyalara birdəfəlik qadağaların qoyulması ilə nəticələndi.
Bu müddət ərzində təzyiqlə üzləşənlərin içərisində media mənsubları da vardı. Bir müddət bundan öncə “Azadlıq” qəzetinin baş redaktoru Qənimət Zahidin ölkə ictimaiyyətinə və demokratik düşərgəyə ünvanladığı məktub da bunu sübut edir. O, ailəsinin təhlükəsizliyindən əndişələndiyini deyərək Fransaya sığındı. Artıq media nümayəndələri arasında belə bir rəy formalaşıb ki, baş redaktor ölkəyə qayıtmayacaq və onun yerinə “Azadlıq” qəzetinin digər əməkdaşları iddialıdır. Bütün bunlara aydınlıq gətirmək üçün 7GUN.AZ olaraq hazırda Fransada olan Qənimət bəylə əlaqə saxladıq və bizi maraqlandıran suallar aydınlıq gətirməyə çalışdıq. Qeyd edək ki, onu tapmaq bir o qədər də çətin olmadı. Elə Qənimət bəy də suallarımızı səmimi şəkildə cavablandırdı.

Eşitdik ki, Fransada ev problemininiz həll olunub. Uşaqlarınızın məktəb problemi də həllini tapdımı?

Uşaqlar məktəbə getməyə başlayıblar. Sadəcə bəzi texniki-bürokratik problemlər var ki, onları həll etməliyəm. Bu problemlərin həlli ilə məşğulam.

Digər maddi problemlərinizi yoluna qoya bilmisinizmi?

Digər maddi problemlər deyəndə nəyi nəzərdə tutduğunuzu açığı, başa düşmürəm. Mən buraya maddi problemləri həll etmək üçün yox, övladlarımı Azərbaycan hökumətinin inzibati terrorundan xilas etmək üçün gəldim və bunu da hər kəsə dəfələrlə açıq bəyan etdim.

Azərbaycana nə vaxt qayıdacaqsınız, ümumiyyətlə qayıtmaq fikriniz varmı?

Azərbaycana dönməyim üçün dediyim, hətta xırda sayılacaq bu problemləri həll etməliyəm, sadəcə onlar mənim vaxtımı alır. Azərbaycana qayıtmayacağım isə müzakirə mövzusu ola bilməz. Azərbaycana qayıdacağam, Və mən indi də öz işimlə, yəni “Azadlıq” qəzeti ilə məşğulam, qayıdandan sonra da, təbii ki, bu işlə məşğul olacağam.

Çoxları deyir ki, Qənimət Zahid mübarizədən yoruldu və bu üzdən ölkəni tərk etdi. Doğrudanmı, mübarizdən yoruldunuz?

Çoxlarının nə dediyinin mənim üçün böyük önəmi var. Amma bunu nəzərə almasam belə, mübarizədən yorulmaq, geri çəkilmək, sakit həyat seçmək,.. mənim kimi adamların taleyinə yazılmayıb. Başqa tərəfdən, nə yatdıq ki, nə də yuxu görək?.. Azərbaycanda demokratiya uğrunda avtoritar bir rejimə qarşı mübarizə gedir və biz həmişə bu mübarizənin içində olmuşuq, həmişə də orada olacağıq. Avtoritarizmə qarşı mübarizə bizim həyat tərzimizdir və insan öz həyat tərzindən, həm də könüllü və şüurlu olaraq intixab etdiyi həyat tərzindən heç yorulmaz.

Uzun illər öz vətənində mübarizə aparan bir insan üçün qürbət, qəriblik həyatı yaşamaq çoxmu ağırdı və ya əksinə?

Mən özümü qürbətdə yaşayan adam saymıram. Hesab edin ki və mən də belə hesab edirəm, ezamiyyətə gəlmiş adam əhval-ruhiyyəsindəyəm. Sadəcə, imkan olanda, görüşə bildiyim qəriblik, qürbət həyatı yaşayan insanlarımıza müəyyən məsləhətlər verə bilirəm. Çox təəssüf ki, Azərbaycandan mühacirət etmiş insanların da əksəriyyəti dəhşətli bir qorxu içindədir və buna heyfsilənirəm. İnsanlar orada qorxunun əlindən qaçıb bu uzaq ölkələrə sığınıblar və onların burada da həmin qorxunu yaşatması məndə ikrah hissi doğurur. Deməli, insanın qorxması üçün onun harada yerləşməsinin elə bir önəmi yoxdur. Qorxmaq istəyən adamlar özlərinə həmişə hansısa əsaslar tapırlar.

Fransaya getdiyiniz müddətdə dostlarınızla əlaqə saxlamısınızmı?

Bundan əvvəl 3 ay Türkiyədə oldum. Fransaya gəlişimdən heç 20 gün də keçməyib. Həm Türkiyədə, həm də burada olduğum günlərdə yaxın dostlarımla, qohumlarla, iş yoldaşlarımla əlaqələrim çox intensivdir. Xüsusilə “Azadlıq”ın kollektivi ilə bütün iş günü ərzində əlaqə saxlayıram. Qəzetin yaradıcılıq və texniki məsələləri ilə bağlı müntəzəm olaraq məsləhətləşirik. Kollektivin mənim müvəqqəti olaraq Azərbaycanda olmadığımdan yana hansısa ciddi problemlərinin olduğunu düşünmürəm.

Şəmşad