Fransada yaşayan azərbaycanlı jurnalist Elnur Məcidli Avropada yaşayan siyasi mühacirlər adından Fransa prezidenti Nikola Sarkoziyə məktubla müraciət edib.

Avropa Azərbaycanlıları Demokratiya Uğrunda (EUROAD) təşkilatının təsisçisi olan Məcidli, Fransa prezidentinə müraciətində onun Cənubi Qafqaza səfərinə və o cümlədən Azərbaycandakı hazırkı vəziyyətə geniş yer verib.
Məktubda həmçinin Qarabağ konflikti ətrafında danışıqlar, Cənubi Qafqaz ölkələrində sosial-iqtisadi problemlər, ərəb ölkələrindəki inqilablar və s. qeyd olunur.
Qloballaşan dünyaya və Avropaya tam mənada inteqrasiyanın sadəcə demokratik cəmiyyətin yaradılmasıyla mümkün olacağını ifadə edən azərbaycanlı jurnalist, Azərbaycan hakimiyyətinin ölkə daxilində apardığı anti-demokratik siyasətə, söz və hüquq azadlıqlarının sərt şəkildə tapdanılmasına toxunub.
Kütləvi toplaşma azadlığının olmadığı ölkədə daxili narazılığın hər keçən gün daha da artdığı, Azərbaycanın atadan oğula keçən korrupsioner hakimiyyət tərəfindən idarə edildiyi, ölkə prezidenti İlham Əliyevin Dubaydakı 70 milyon dollar dəyərindəki villalarınının prezident maaşıyla ala bilməsinin mümkün olmayacağı Fransa prezidentinə müraciətdə öz əksini tapıb.
Məktubun son hissəsində azərbaycanlı jurnalist öz siyasi-ictimai fəaliyyətinə də yer verərək 2010 parlament seçkilərində iştirak zamanı məruz qaldığı təzyiqlər, Azərbaycandakı diktaturaya qarşı 11 Mart çağırışından sonra haqqında cinayət işinin açılması və İnterpol axtarışına verilməsi, Hillari Klinton – Məmmədyarov görüşündən sonra haqqında açılan cinayət işi dayandırılsa da , hələ də bu saxta cinayət işinə xitam verilməməsini yazıb.
Son altı ayda 20-dən çox gəncin siyasi məhbus olduğunu qeyd edən Elnur Məcidli, ailəsinə və qohumlarına olan təzyiqləri özünə qarşı siyasi şantaj adlandırıb.
EUROAD-ın Fransa və Avropadakı fəaliyyəti barədə məlumatın da yer aldığı məktubun sonunda Elnur Məcidli Fransa prezidentinə 8 ay sonra keçiriləcək növbəti prezident seçkilərində uğurlar arzulayıb.
Məktub prezident administrasiyasının yerləşdiyi Yelisey sarayının (Palais Elysee) katibliyi ilə görüş zamanı Elnur Məcidli tərəfindən təqdim olunub.

azadlıq.info