VK-nın qərarı ilə fəaliyyəti dayandırılmış vəkil Xalid Bağırov da proseslərə qatılır

Sabah, noyabr 1-də, 15:30-da Şəki Şəhər Apelyasiya Məhkəməsində hakim Qədəm Babayevin sədrliyi ilə həbsdə olan hüquq müdafiəçisi, İctimai Palatanın təhqiqat qrupunun rəhbəri Vidadi İsgəndərlinin şikayəti üzrə məhkəmə prosesi keçiriləcək.
Şikayətə iş üzrə hazırlıq iclasından fərqli olaraq Vidadi İsgəndərlinin iştirakı ilə baxılacaq. V.İsgəndərlini vəkil Yalçın İmanov müdafiə edir. Onun digər vəkili, Vəkillər Kollegiyasının (VK) qərarı ilə fəaliyyəti dayandırılmış Xalid Bağırov da proseslərə qatılır. Ötən prosesdə Y.İmanov V.İsgəndərlinin məhkəmə dövründə zaminə buraxılması; barəsindəki cinayət təqibinə xitam verilməsi; Göyçay Rayon Məhkəməsinin hökmündən verdikləri şikayətə məhkəmə araşdırması aparılmaqla baxılması; mətbuat nümayəndələrinə məhkəmə prosesində audio-video vasitələrdən istifadəsinə şərait yaradılması barədə vəsatətlərlə çıxış etmişdi. Bildirmişdi ki, V.İsgəndərli hüquq müdafiəçisi tək fəaliyyəti və İctimai Palatadakı çıxışlarına görə həbsə alınıb. Hakim heç bir əsas göstərmədən vəsatətləri təmin etməmişdi.
Xatırladaq ki, V.İsgəndərli İctimai Palatanın 2 aprel mitinqinə görə həbs olunaraq 8 sutka, 17 aprel mitinqindən 3 saat əvvəl tutularaq 15 sutka azadlıqdan məhrum edilmişdi. Mayın 2-də ona verilən 15 sutka həbs cəzasının müddəti bitəndə ona qarşı ittiham irəli sürülüb və barəsində Cinayət Məcəlləsinin 159.4.1 və 160.2.1-ci maddələri ilə cinayət işi başlanılıb. Həmin gün V.İsgəndərli barədə məhkəmə qərarı ilə həbs qəti-imkan tədbiri seçilmişdi. Sonradan ona qarşı 132-ci maddə ilə də cinayət işi başlanıb. Avqustun 27-də Göyçay Rayon Məhkəməsində hakim Elxan Süleymanovun sədrliyi ilə keçirilən prosesdə V.İsgəndərliyə hökm oxunub. O, 3 il azadlıqdan məhrum edilib. Yerli və beynəlxalq hüquq-müdafiə təşkilatları V.İsgəndərlinin siyasi baxışlarına görə həbs edildiyini bəyan edərək onun azadlığa buraxılmasını tələb edir. V.İsgəndərli və onun vəkilləri Göyçay Rayon Məhkəməsinin hökmünü siyasi sifarişlə çıxarıldığı üçün ədalətli saymayaraq hökmdən apelyasiya şikayəti verib.
musavat.com