Keçmiş QSC rəhbəri yollarını Zülfüqarlı qardaşlarından ayırır

Bir müddət öncə “Azəriqaz” QSC-nin sədri Əlixan Məlikov vəzifəsindən uzaqlaşdırıldı və bu qurum Azərbaycan Respublikası Dövlət Neft Şirkətinə (ARDNŞ) birləşdirildi. Əlixan Məlikova isə heç bir vəzifə verilmədi. Sonradan məlum oldu ki, Əlixan Məlikov “Xəzər boru” MMC-nin sahibləri olan Zülfüqarlı qardaşları ilə ortaq biznesə sahibdir. Hətta həmin ərəfədə belə bir məlumat yayıldı ki, “Xəzər boru”nun səhmlərinin 42.8 faizi Zülfüqarlı qardaşlarının, qalan hissəsi “Azəriqaz”ın keçmiş rəhbəri Əlixan Məlikovundur. Bundan sonra Dövlət Neft Şirkətinin əməkdaşları zavoda basqın edərək buranı zəbt etdilər.
Zavodun baş direktoru Ayaz Gülümcanov isə bununla bağlı mediaya açıqlama verərkən Əlixan Məlikovu da günahlandırdı. O bildirirdi ki, zavodun basılmasında Əlixan Məlikovun da göstərişi olub.
Bir sözlə, o, Zülfüqarlı qardaşları ilə arasında olan konfliktdən istifadə edərək Rövnəq Abdullayevdən kömək istəyib. Zavoda basqın edən və geyimlərinin üzərinə “SOCAR” sözü yazılmış şəxslər də həmin vaxt onlara “yuxarıdan” tapşırıq gəldiyi üçün heç kimi zavoda buraxmadıqlarını bildirmişdilər.
Bu gün Bizimxeber.com-a Əlixan Məlikovla bağlı maraqlı bir məlumat daxil olub. Məlumatda bildirilir ki, artıq Əlixan Məlikov “Xəzər boru” məsələsində kimlərləsə anlaşa bilib. Ona konkret olaraq Dövlət Neft Şirkətində vəzifə veriləcəyini deyən mənbə bildirir ki, əslində bu təklif hansısa bir şəxs tərəfindən gəlib. Mənbə həmin şəxsin Rövnəq Abdullayev olduğunu da istsina etmir.
Belə çıxır ki, Əlixan Məlikov “Xəzər boru” məsələsində tutduğu mövqeyin “ənam”ını indi almağa çalışır: “O vaxt ona tapşırmışdılar ki, sussun. O da səsini çıxarmadı və Zülfüqarlı qardaşlarını meydanda tək qoydu. Indi də vəzifəyə gedir deyə, Zülfüqarlı qardaşları ilə arasında ciddi münaqişə yaşanır”.
Mənbə onu da qeyd edir ki, “Xəzər boru” zavodu MDB-də analoqu olmayan zavoddur. Hətta bu zavodun açılış mərasimində ölkə başçısı da iştirak edib. Zavodun ARDNŞ rəhbərliyi tərəfindən ələ keçirilməsi və bunun müqabilində Əlixan Məlikova vəzifə təklif olunması isə başqa qaranlıq məqamlarda xəbər verir. Mövzunu diqqətdə saxlayacağıq. Yazıda adı çəkilən şəxslərin də mövqeyini dərc etməyə hazırıq.

Bizimxeber.com