Ölkə ərazisində 12-17 dərəcə şaxta gözlənilir


Noyabrın 19-da Bakıda və Abşeron yarımadasında yağış yağacağı gözlənilir. ANS PRESS-in Ekologiya və Təbii Sərvətlər Nazirliyi Milli Hidrometeorologiya Departamentinə istinadla verdiyi məlumata görə, sabah havanın buludlu keçəcəyi, mülayim şimal-qərb küləyinin gündüz cənub-şərq küləyi ilə əvəz olunacağı gözlənilir. Temperatur gecə 4-6, gündüz 6-8 dərəcə təşkil edəcək.

Noyabrın 20-də paytaxtda dəyişkən, buludlu , əsasən yağmursuz hava müşahidə olunacaq, arabir tutulacaq. Gecə və axşam yarımadanın bəzi yerlərində qısamüddətli yağıntılar proqnozlaşdırılır. Cənub küləyi axşama doğru şimal küləyi ilə əvəzlənəcək. Temperatur gecə 3-7, gündüz 7-11 dərəcə olacaq.

Bölgələrdə noyabrın 19-da bəzi yerlərdə yağıntı olacaq, dağlıq və dağətəyi ərazilərdə sulu qar, qar yağacaq. Səhər ayrı-ayrı yerlərdə mülayim qərb küləyi əsəcək. Temperatur Mərkəzi Aranda gecə 0-5 dərəcə isti, gündüz 6-11 dərəcə olacaq. Dağlarda gecə 3-8 şaxta, gündüz 0-5 dərəcə isti, yüksək dağlıq ərazilərdə 12-17 dərəcə şaxta gözlənilir.

Noyabrın 20-də də dağlıq və dağ ətəyi ərazilərdə qar yağacaq, gecə və axşam yağıntılı hava şəraiti müşahidə olunacaq. Mərkəzi Aranda gecə 0-5 dərəcə, gündüz 6-11 dərəcə isti, dağlarda gecə 3-8 dərəcə şaxta, gündüz 0-5 dərəcə isti gözlənilir.