Gülağa Aslanlı: "Məncə o, gücünü daha enerjili işlərə sərf etsə cəmiyyətə daha çox xeyir verə bilər"

Ötən gün Azərbaycan Demokrat (ADP) partiyasının sədri Sərdar Cəlaloğlu Bizimxebercom xəbər portalına açıqlama verərək ölkədəki siyasi durum və müxalifətdaxili problemlərə münasibət bildirmişdi. Ancaq ADP sədrinin İctimai Palata (İP) ilə bağlı söylədiyi fikirlər müxalifət düşərgəsində birmənalı qarşılanmadı. Qeyd edək ki, S. Cəlaloğlu İctimai Palatanı iki partiyanın AXCP və Müsavat Partiyasının monopoliyası altında olan bir qurum adlandırmışdır. Ona görə də, ADP sədrinin fikirlərinə də ilk cavab Müsavat Partiyasından gəldi. Müsavat başqanının müavini Gülağa Aslanlı Bizimxeber.com saytına bildirdi ki, Sərdar Cəlaloğlunun İP-lə bağlı söylədikləri həqiqəti əks etdirmir: "Hamıya məlumdur ki, İctimai Palata 2010-cu ilin parlament seçkilərindən sonra yaranıb. Seçkinin nəticələrindən narazı olan namizədlər və seçkidə iştirak edən şəxslər tərəfindən yaradılmış bu qurum həmişə cəmiyyətin bütün təbəqələrinə açıq olub. Eyni zamanda seçkinin nəticələrindən narazı olan hər hansı bir şəxs Koordinasiya Şurasına müraciət edibsə, İP-ya üzv qəbul olunub. İP-in katibi kimi deyə bilərəm ki, indiyə qədər bu quruma üzv olunmaq istəyən heç bir kəsə məhdudiyyət qoyulmayıb. Koordinasiya Şurasına müraciət edənlərin hamısı İP-ə üzv qəbul olunub. Sərdar Cəlaloğlunun hansı məhdudiyyətlərdən danışması açığı mənə çatmır. Çünki bu qurumda heç bir məhdudiyyət yoxdur. ADP-nin özündən olan bəzi şəxslər belə İP-in üzvlüyünə qəbul olunub. Belə bir halda, Sərdar Cəlaloğlunun məhdudiyyətlərdən danışması düzgün deyil".

Digər müxalif partiyaların İP-da təmsil olunub-olunmamasına gəlincə, G.Aslanlı bildirdi ki, bu həmin partiyaların şəxsi işidir: "Hansı partiya burada təmsil olunmursa, bu, həmin partiyanın şəxsi işidir. Ancaq bu gün İP-də AMİP, KXCP, VHP və hətta Ümid Partiyasının üzvləri də var. Bunlar seçkinin nəticələrini tanımayan şəxslərdir və bu qurumda birləşiblər. Amma bir məsələ də var ki, özlərini konstruktiv müxalifət adlandıran və seçkinin nəticələrini bəyənib hakimiyyətlə saziş imzalayan partiyaların sədrləri İP-də təmsil oluna bilməzlər. Çünki onlar seçkinin nəticələrini tanıyıblar, İP isə tanımayıb".

Sərdar Cəlaloğlunun İctimai Palatanı iki partiyanın monopoliyasında olan bir qurum adlandırmasına münasibət bildirən Gülağa Aslanlı ADP sədrinin daha səmərəli işlərlə məşğul olmağa çağırdı: "Son zamanlar Sərdar Cəlaloğlu bütün işini-gücünü ancaq İctimai Palatanın tənqidinə yönəldib. Məncə o, gücünü daha enerjili işlərə sərf etsə, cəmiyyətə də daha çox xeyir verə bilər. Onun potensialının yüksək olduğunu mən də bilirəm. Amma təəssüf ki, o, aidiyyəti və dəxli olmayan söhbətlər edir. Axı, həmin partiyalara İctimai Palata tərəfindən yox deyilməyib. Sadəcə müzakirə olunub ki, İctimai Palata formatı özünü təsdiq etmiş formatdır və yeni bir qurumun yaranmasına ehtiyac yoxdur. Biz bir daha bəyan etmişik ki, kim istəyirsə İP-də təmsil oluna bilər, bu qurumun qapısı həmişə seçkinin nəticələrindən narazı olan qüvvələrin üzünə açıqdır".