Şəhərin müxtəlif yerlərində quraşdırılan izləmə kameraları niyə işləmir?

Yazıçı-publisist Rafiq Tağının bıçaqlanmasından sonra şəhərdə quraşdırılan kameraların işləməməsi əsas müzakirə mövzularından birinə çevrilib. Xatırlayırsızsa, 2009-cu ildə şəhərin əksər küçələrində “Təhlükəsiz şəhər” layihəsi böyük səs-küylə ictimaiyyətə təqdim olundu. Xüsusi qeyd olundu ki, bundan sonra şəhərdə baş verən cinayətlərin demək olar ki, hamısı açılacaq.

Bu proyektə büdcədən 10 milyon manat ayrıldığını və bu rəqəmin artırılacağını da demişdilər. Bu layihə gerçəkləşib sona çatmamış daha bir layihə - “Nəqliyyatın İntellektual idarə olunması” sisteminin icrasına başlandı. Artıq şəhərin dörd bir tərəfində bu layihə çərçivəsində də minlərlə kamera quraşdırılıb. Bu layihə də büdcədən 77 milyon manat “yeyib”.
Üst-üstə büdcə pullarından, yəni xalqın cibindən bu layihələrə 87 milyon manat xərclənsə də, vətəndaşların təhlükəsizliyi baxımından faktiki heç nə dəyişməyib.
R.Tağının bıçaqlandığı ərazidə bu layihələr çərçivəsində quraşdırılan azı 10 kamera var. Amma həmin kameraların heç biri işləmir. Noyabrın 8-də axşam 20 radələrində “Yeni Müsavat”ın əməkdaşı Elşad Məmmədliyə qarşı avtoxuliqanlıq edildi. O, öz maşını ilə gedərkən arxadan gələn Az 10 LP 050 nömrəli “CİP” ötmə əməliyyatı qaydasını pozaraq onun maşınının sağına keçib, qəza şəraiti yaratdı. Bu məsələ ilə bağlı hüquq-mühafizə orqanlarına müraciətlərdən sonra bəlli oldu ki, ərazidə quraşdırılan kameralar işləmir. Təxminən 1 həftə əvvəl “Yeni Müsavat”ın gecə növbəsində çalışan sürücünün idarə etdiyi “Nissan-Tida”nı “VAZ-2107" markalı avtomobil əzərək hadisə yerindən qaçıb. Yenə də araşdırmalar zamanı aydın olub ki, ərazidə quraşdırılan kameralar işləmir. Belədə sual olunur - büdcədən bu layihələrə ayrılan 87 milyonun xərclənməsi nəyə gərək idi? Müqəvva-kameraların şəhərin dörd bir tərəfində quraşdırılması kimə lazımdır?
Bu suallara milyonları mənimsəyən məmurlarımız cavab verməlidirlər.

Musavat.com