“Siyasi partiyalar haqqında” Qanunla bağlı Venesiya Komissiyasına çağırış edildi

Hakimiyyət “Siyasi partiyalar haqqında” Qanuna əlavə və dəyişiklikləri qəbul etməyə hazırlaşır. Prezident Administrasiyası İctimai-siyasi şöbəsinin müdiri Əli Həsənov bildirib ki, dekabrın 17-də Avropa Şurasının Venesiya Komissiyasında qanun layihəsinin son ekspertizası keçiriləcək. Ondan sonra layihə müzakirə üçün parlamentə təqdim olunacaq.

Şöbə müdirinin sözlərinə görə, layihədə həm siyasi partiya təmsilçilərinin indiyə qədər mətbuatda səsləndirilən mülahizə və fikirləri, həm də Venesiya Komissiyasının tövsiyələri nəzərə alınıb. Bu barədə Seçkilərin Monitorinqi və Demokratiyanın Tədrisi Mərkəzi (SMDT) isə “Siyasi partiyalar haqqında” Qanuna əlavə və dəyişikliklər layihəsini araşdıraraq sənədə rəy verib. Rəydə nələrin əksini tapdığı barədə ötən saylarımızın birində ətraflı məlumat vermişik.
Rəydə qanuna partiyalar üçün ciddi problemlər yaradan maddələrin daxil edildiyi əksini tapıb. Müxalifət isə bildirir ki, antidemokratik dəyişiklikləri qəbul etməyəcəklər.
Müsavat Partiyası başqanının müavini Gülağa Aslanlı bildirdi ki, hakimiyyət “Siyasi partiyalar haqqında” Qanuna hansı dəyişiklikləri təklif etdiyini siyasi partiyalardan, cəmiyyətdən gizli saxlayır, heç bir müzakirələr təşkil eləmir. Bunun özü iqtidarın qaranlıq niyyətlərinin olduğunu göstərir: “Hakimiyyətdən bu gözləniləndir. Amma Avropa Şurasının Venesiya Komissiyasının da ona təqdim olunmuş layihəni gizli saxlaması, Azərbaycanda olan siyasi partiyaların təmsilçilərini müzakirəyə cəlb etməməsi anlaşılan deyil. Belə çıxır ki, Venesiya Komissiyası Azərbaycanda siyasi partiyalarla əlaqə qurmaq barədə fikirləşmir və ancaq hakimiyyətlə işləyir və hakimiyyətin istəkləri həyata keçir. Bu, Avropa Şurasının, Venesiya Komissiyasının fəlsəfəsinə ziddir”.
G.Aslanlı bildirdi ki, siyasi partiyaların yenidən qeydiyyatdan keçirilməsi və bunun üçün imzaların sayının mindən 5 minə qaldırılması, hər bir partiya üzvünün şəxsiyyət vəsiqələrinin surətlərinin bir ay müddətində təqdim olunması tələbinin qanuna daxil edilməsi qətiyyən qəbul edilən deyil: “Bu, siyasi partiyalara olan təzyiqin ən yüksək forması ola bilər. Bu o deməkdir ki, partiya üzvü olan bütün şəxslər hakimiyyətin nəzarətində olmalıdır və seçkilər zamanı həmin siyahılar seçki komissiyalarına göndərilərək onların adlarının seçici siyahılarına düşməsinin qarşısı alınacaq. Partiyaların maliyyələşməsi ilə bağlı göstərilən kriteriyalar da real müxalifət partiyalarının zərərinədir. Qanuna o cür əlavə və dəyişikliklər qəbul edilməzdir və ciddi etirazlar yaradacaq”.
KXCP sədrinin müavini Ədalət Yusibov bildirdi ki, demokratiya dalğasının Azərbaycan sərhədlərinə yaxınlaşdığı bir vaxtda hakimiyyətin siyasi partiyaların fəaliyyətinə zərbə vuran addımlar atmaq istəməsi sonda iqtidarın özünün zərərinə işləyəcək: “Hakimiyyətin Venesiya Komissiyasına göndərdiyi qanun layihəsi mətbuatda son günlərdə açıqlanan kimidirsə, biz qanuna o cür dəyişiklikləri və əlavələri qəbul etməyəcəyik. Venesiya Komissiyası belə bir layihə ilə razılaşıbsa, Azərbaycan müxalifət qüvvələri, ictimaiyyəti bunu hakimiyyətlə alver predmeti kimi qəbul edəcək. Biz Venesiya Komissiyasını siyasi partiyalara əlavə problemlər yaradacaq və Azərbaycanda təkpartiyalı sistemin bərqərar olmasına təkan verəcək qanun layihəsi ilə razılaşmamağa çağırırıq”.
AMİP katibi Əli Orucov bildirdi ki, hakimiyyət elə variant işləyib ki, real müxalifət partiyaları qanunun bəhrəsindən kənarda qalır, hətta əlavə təzyiq rıçaqları ilə üzləşirlər: “Hakimiyyət həm əsas rəqibi olan partiyalara qeydiyyat problemi yaratmaq istəyir, həm də özünün cib müxalifətinə ayırdığı qeyri-leqal maliyyəni yeni qanunla leqallaşdırmaq fikrindədir. Real müxalifət partiyaları hakimiyyətin marağına xidmət edəcək qanunun qəbuluna ciddi etiraz edəcəklər. Venesiya Komissiyası hakimiyyətin Azərbaycanda müxalifət partiyalarını tamamilə sıradan çıxarmaq planına dəstək verməməlidir”.

Musavat.com