20 Yanvar caniləri mükafatlandırılır

Yanvar ayının 23-24-də Soçidə Azərbaycan və Ermənistan prezidentlərinin növbəti görüşünü təşkil etməyi planlaşdıran Rusiya 20 Yanvar qırğınlarında iştirak edən keçmiş hərbçilərə veteran statusu verməyə hazırlaşmaqla ölkəmizə münasibətdə səmimi olmadığını bir daha nümayiş etdirir.Dağlıq Qarabağ münaqişəsinin başladığı ilk günlərdən müxtəlif yollarla Ermənistanı müdafiə edən və 20 Yanvarda onlarla günahsız insanın qətl edilməsinə göstəriş verən Kreml ölkəmizə münasibətdə daha bir xoşagəlməz addım atmaq niyyətindədir. Belə ki, Rusiya Azərbaycan üçün ağrılı olan bu faciəli hadisələrin növbəti ildönümü ərəfəsində 20 Yanvar qırğınlarında iştirak edən və əli dinc soydaşlarımızın qanına batan hərbçilərə veteran statusu vermək niyyətindədir. Modern.az saytının məlumatına görə, Rusiyada “Veteranların statusu haqqında” qanuna dəyişiklik etmək istəyirlər. Dəyişikliklərə əsasən, SSRİ ərazisində elan edilmiş fövqəladə vəziyyətlərdə, silahlı münaqişələrdə “öz borcunu yerinə yetirən hərbi qulluqçulara” veteran statusu verilməsi nəzərdə tutulur. Bu isə, o deməkdir ki, 1990-cı il yanvar ayının 19-dan 20-nə keçən gecə Bakıda dinc əhaliyə divan tutan keçmiş SSRİ hərbçiləri veteran statusu alaraq, dövlətdən müxtəlif güzəştlər əldə edəcəklər. Məsələ ilə bağlı diqqəti cəlb edən bir önəmli fakt isə Kreml tərəfindən 20 Yanvar qırğınlarında iştirak edən hərbçilərə veteran statusunun verilməsi məsələsinin məhz Azərbaycan üçün ağrılı olan 20 Yanvar faciəsinin növbəti ildönümü ərəfəsində gündəmə gətirilməsidir. Məsələyə münasibət bildirən hərbi ekspert, istefada olan polkovnik-leytenant Üzeyir Cəfərov Rusiyanın 20 Yanvar qırğını iştirakçılarına veteran statusu verməyə hazırlaşmasını Azərbaycan xalqının heysiyyatı ilə oynamaq və ölkəmizə qarşı düşmən mövqedə dayandığını bir daha nümayiş etdirmək kimi dəyərləndirdi. Hərbi ekspert: “Rusiya tərəfindən belə bir addımın ölkəmiz üçün ağrılı olan 20 Yanvar faciəsinin növbəti ildönümü ərəfəsində atılması heç də təsadüfi deyil. Moskva bununla da, Azərbaycana qarşı yenə də analoji qırğınlara əl ata biləcəyini nümayiş etdirir”,- dedi.