Xalid Bağırov: “Fərhad Nəcəfovun Aslan İsmayılovun ofisini araşdırmağa getməsi şübhəlidir”

Ölkədə vəkillərə qarşı siyasi sifariş əsasında həyata keçirilən repressiyalar davam etdirilir. Bu siyasi və sifarişli oyunun başında isə səlahiyyət müddəti bitməsinə baxmayaraq Vəkillər Kollegiyasının (VK) Rəyasət Heyyətinin sədri postunu az qala özəlləşdirmiş və legitim olmayan bir təşkilatın rəhbəri kimi tanınan Azər Tağıyev durur. Əslində, Azər Tağıyev hüququn və ədalətin qorunması naminə vəkilləri müdafiə etməlidir. Ancaq vəzifəsininin özəl statusunu uzatmaq məqsədi ilə sifarişlər və öhdəliklər götürən VK sədri eyni zamanda üç vəkili hədəfə alıb. Məhz onun götürdüyü öhdəlik nəticəsində öncə vəkil Xalid Bağırovun vəkillik müddəti bir il müddətində donduruldu, daha sonra Elçin Namazov kollegiyadan xaric olunaraq vəkillik statusu ləğv edildi. Vəkillərə qarşı siyasi sifariş əsasında repressiya aparatını işə salan Tağıyev vəkil Aslan İsmayılovu da diqqətdən kənarda saxlamadı. Hədəfə alınan vəkilin bir neçə gün bundan öncə ofisinin basqına məruz qalması bir daha göstərdi ki, Azər Tağıyev “qılıncını yerə qoymaq” istəmir və bu “Domokl qılıncı” hələ çox başlara endiriləcək.
Bildiyimiz kimi, vəkil Aslan İsmayılov xəstəxanada yatdığı bir vaxtda Azər Tağıyevin müavini Fərhad Nəcəfov himayəsində olan dəstəsi ilə onun ofisinə basqın edib. Vəkilin köməkçilərindən müəyyən sənədlər tələb edilib. Vəkilin köməkçiləri F.Nəcəfova izah edib ki, tələb etdikləri sənədləri onlara yalnız Aslan İsmayılov verə bilər. Lakin Nəcəfov kobudluq etməklə sənədləri israrla tələb edib. Ancaq Aslan İsmayılovun zəngindən sonra Nəcəfov ofisi tərk edib.
Ötən gün Azər Tağıyev mediaya açıqlama verərək bildirib ki, bu araşdırmalar vəkilin öz xahişi əsasında həyata keçirilib. Vəkil Aslan İsmayılov isə açıqlamasında VK sədrini yalan danışmaqda ittiham edib. Vəkil vurğulayıb ki, onun bu basqından heç bir xəbəri olmayıb.
Vəkillər Kollegiyası tərəfindən hər hansı bir vəkilin ofisinin araşdırılmasının nə dərəcədə hüquqi əsası olub-olmamasını dəqiqləşdirmik üçün vəkil Xalid Bağırovla əlaqə saxladıq. O, 7GUN.AZ xəbər portalına açıqlama verərək bildirdi ki, ofis istənilən halda şəxsi mülkdür və bu araşdırma şəxsi əmlaka müdaxilə kimi dəyərləndirilməlidir:
“Əvvəla Aslan İsmayılov barəsində araşdırmanı Vəkillər Kollegiyasının İntizam Komissiyası aparır. Ona görə də, Rəyasət Heyətinin sədr müavini Fərhad Nəcəfovun həmin komissiyanın üzvü olmadığı halda Aslan İsmayılovun ofisini araşdırmağa getməsi şübhəlidir. Rəyasət Heyətinin üzvünün yoxlamaya müdaxilə etməsi, araşdırmanın qərəzsizliyinə və obyektivliyinə şübhə yaradır. İkincisi ofis istənilən halda şəxsi mülkdür, ora daxil olma şəxsi əmlaka müdaxilə kimi qəbul edilməlidir. Əgər vəkilin fəaliyyəti ilə bağlı hər hansı araşdırma arparmaq istəyirlərsə, o zaman məktub yazıb hər hansı sənədləri tələb edə bilərlər. Digər tərəfdən İntizam komissiyası adından da göründüyü kimi yalnız vəkilin fəaliyyətinin intizam vəziyyətini yoxlaya bilər. O ki qaldı, vəkilin fəaliyyətini mahiyyət üzrə yoxlanılması, bu, qanunsuz və məntiqi baxımdan mənasızdır. Çünki hər bir vəkilin fəaliyyətinin özəlliyini vəkillə müştəri arasındakı vəkil sirri təşkil edir və həmin məsələləri araşdırma heç Vəkillər Kollegiyasının da səlahiyyəti çatmır”.

Məsud Ağasoy