Türk diplomat fransız həmkarını pis vəziyyətdə qoyub

Fransa prezidenti Nikola Sarkozinin İrəvanda söylədiyi “Türkiyə soyqırımı tanımalıdır” açıqlaması, Parisdə türk və fransız diplomatlar arasında mübahisəyə səbəb olub.
7GUN.AZ-ın “Hurriyet” qəzetinə istinadən verdiyi məlumata görə, Türkiyənin Parisdəki səfiri Tahsin Burcuoğlu Sarkozinin İrəvandakı açıqlamasına Ankaranın rəsmi mövqeyini bildirmək üçün Yelisey Sarayına gedib. Orada Sarkozinin xarici siyasət müşaviri Jan Devid Levitte ilə görüşən səfir, “cənab Sarkozi həqiqətlərdən qaçır. Siyasətçilərin tarixə görə, siyasi maraqları naminə açıqlamalar verməsi son dərəcə yanlışdır. Sarkozinin söylədiklərini heç bir şəkildə qəbul etmirik və qınayırıq. Bu vəziyyət türk-fransız münasibətlərinə zərbə vurub.
Sarkozinin müşaviri Levitte isə uzun illər fransız müstəmləkəsi olan Əlcəzairi misal çəkərək, “Baxın, biz Əlcəzairdə baş verənləri qəbul etdik. Biz sizin dostunuz olduğumuz üçün bunları söyləyirik” deyib. Türk səfir isə Levitteyə, “Sizin Əlcazairdə qəbul etdiyiniz müharibə idi. Siz heç bir zaman oradakı soyqırımı tanımadınız. Həqiqətlərdən qaçmayın” cavabını verib.


7GUN.AZ