“Qarabağın maliyyələşməsi büdcə smetalarında nəzərdə tutulmalıdır”

Deputat Zahid Oruc Dağlıq Qarabağın Azərbaycanın xəritəsində göstərildiyi kimi, maliyyə sənədlərində də ifadə olunmasını təklif edib. Modern.az-a açıqlamasında o fikrini belə əsaslandırıb ki, bu addım Azərbaycanın siyasi manevr müstəvisi üçün çox gərəklidir və sadə dillə desək, Dağlıq Qarabağa şərti bir status vermək və onun hökümətin bütün siyasətində nəzərə alınması gərəkdir.

“Konkret deyilsə, biz Xankəndinin bərpası, onun infrastrukturunun yenidən qurulması, işğalın vurduğu ağır nəticələrin ortadan götürülməsi xərcləri kimi də ifadə edə bilərik. Yəni yarımbəndlərdə təyinat dəqiq göstərilə bilər. Ancaq başlıca olaraq ölkə xərclərində Dağlıq Qarabağı göstərməliyik”.
Zahid Oruc bunun Azərbaycanın Konstitusiyasının tələbi olduğunu qeyd edib: “Digər tərəfdən biz dəfələrlə vurğulayırıq ki, Qarabağda normal iqtisadiyyat qurula bilməyib, əsasən terrordan, narkotikadan maliyyələşmə var. Ermənilər xüsusilə də beynəlxalq dairələrindən gələn yardımlar hesabına yaşayırlar. O cümlədən bir sıra hallarda ABŞ-ın hər ilin maliyyələşməsində 8 milyon dollara yaxın vəsait müxtəlif hümanitar məqsədlərlə bura yönəldilir. Bunun bizim tərəfimizdən süngü ilə qarşılanması da normaldır, çünki bu Qarabağa ayrı bir subyekt kimi yanaşmaq və Azərbaycanın başı üzərindən suveren hüquqlarımıza xələl gətirərək addımlar atmaqdır. Qarabağın sanki müstəqilləşməsinə bir maliyyə dəstəyidir”.
Deputat bildirib ki, buna görə də Qarabağın maliyyələşməsi büdcə smetalarında nəzərdə tutulmalıdır: “Dünyaya göstərmərliyik ki, nə zaman onlar Azərbaycan Respublikasının Konstitusiyasının qanunlarına hörmətlə yanaşacaqlar, ərazi bütövlüyümüzü tanıyacaqlar, o zaman Azərbaycan onlara vətəndaş kimi sahib duracaq və o bölgənin öz ərazisi kimi inkişafını, gələcək quruculuğunu tamamilə üzərinə götürəcək”.