Onlar zərərə düşəcəklərindən ehtiyatlanırlar

“Son günlər Neftçalanın Aşağı Qaramanlı kəndinin taxılçılıqla məşğul olan fermerləri arasında işə ciddi hazırlıq görülmür.
Bunu fermerlərin əkin üçün sahə ayırmaması və sahələrin şumlanmamasından da aydın görmək olur. Düzdur, bəzi fermerlər taxıl əkəcəkləri sahələri şumlatdırıb. Amma bu əkilməsi nəzərdə tutulan 4500 hektarlıq sahənin müqabilində xeyli azdır.
Fermerlər taxılçılığın digər sahələrdən daha az gəlir gətirdiyi qənaətindədirlər. Ona görə də, əkinə başlamayan fermerlər, buna keçən il taxılçılığın onlara ziyanla başa gəlməsini səbəb göstərirlər: “Ötən il əkdiyim taxıldan heç bir xeyir göturmədiyimə görə, bu il taxıl əkməyəcəyəm. Çünki taxılın maya dəyəri çox aşağıdır”, - deyə fermer Qara Abbasov şikayətlənib.
Yerli fermerlər taxılçılıq sahəsinə marağın azalmasını digər kənd təsərrufatı bitkilərinin daha çox gəlir gətirməsilə əsaslandırır. Kəndin bəzi fermerləri isə məhsuldarlığın aşağı olmasını yuksək reproduksiyalı taxıl toxumlarını əldə edə bilməmələrilə izah edir.
“İndiyə qədər torpaq hələ şumlanmayıb. Ona görə ki, əkdiyimiz toxumlar bizi qane etmir. Həddindən artıq ziyana düşmüşük, geri qalmışıq. Əkdiyimiz toxumla sahələrdən xeyir göturə bilmirik”, - deyə fermer Əziz Əliyev vurğulayıb.
Neftçala rayon dövlət toxumçuluq mufəttişliyinin rəisi Həsən Nədiyev isə yerli şəraitdə taxılın maya dəyərinin nisbətən baha başa gəldiyini etiraf edir. Onun sözlərinə görə, dövlət bunu nəzərə alaraq, fermerlərə ildə iki dəfə subsidiya verir ki, müəyyən xərcləri kompensasiya edə bilsinlər. Fermerlərin toxumla bağlı probleminə gəlincə, Həsən Nədiyev bu barədə də problemlərin aradan qaldırıldığını bildirir: “Hazırda rayonumuzdakı anbarda 2 min tona yaxın dərmanlaşdırılmış sertifikatlaşdırılmış toxumlarımız var. İstənilən fermer bizim toxum mufəttişliyinə muraciət edib, həmin toxumları razılaşma yolu ilə muəyyən qiymətlərlə ala bilər. Bu barədə bizim heç çətinliyimiz yoxdur”.
Sonda toxumçuluq mufəttişliyinin rəisi onu da bildirib ki, hazırda rayonda 16 özəl toxumçuluq təsərrüfatı fəaliyyət göstərir.

Ramin