Qəzənfər Ağayev rayonun abadlaşdırlması üçün ayrılan pulları kimə arxalanaraq mənimsəyir?

Dəfələrlə ölkə mətbuatında Masallı rayon İcra Hakimiyyətinin başçısı Qəzənfər Ağayevin rayondakı qanunsuz əməlləri barədə məlumatlar verilib. Həmin məlumatlarda Ağayevin özünü Masallının ağası kimi aparması, rayonda sözün əsl mənasında monopoliya yaratması kimi məlumatlar yer alıb.
Ümumiyyətlə, əksər icra başçıları hansısa rayonda özbaşınalıqla məşğul olan zaman yuxarı dairələrdəki məmurlara arxalandıqlarını cəmiyyətə sırımağa çalışırlar. Mətbuatın onların qanunsuz əməlləri ilə bağlı yazıları dərc olunanda da ya həmin mətbu orqanı məhkəməyə verməklə hədələyir, ya da müxtəlif təzyiqlərdən istifadə etməklə onları susdurmağa çalışırlar. Təki, əməllərinin üstü açılmasın.
Cənub bölgəsi birbaşa olaraq icra başçılarının hücumuna məruz qalıb. Sözün əsl mənasında, yerli məmurlar sadə vətəndaşları isismar etməklə məşğuldurlar. Bu özbaşınalığın ən dözülməz həddi Masallı rayonundadır. 2006-cı ildə Masallının icra başçısı vəzifəsinə təyin olunan Qəzənfər Ağayevin yerli əhali ilə münasibətləri həmişə kəskin və ziddiyyətli olub. Rayonda torpaq sahələrinin ucdantutma satılması ilə başlanan bu ziddiyyət sonrakı mərhələlərdə aksiyalarla yadda qaldı. İşə başladığı ilk günlərdən əhali ilə icra başçısı arasındakı ziddiyətli münasibətlər bəzən qarşılıqlı xoşagəlməz ifadələrə kimi yüksəlib. Masallı sakinləri onun qanunsuz hərəkətləri, sahibkarları çökdürən addımları barədə Prezident Administrasiyasına və digər aidiyyəti dövlət qurumlarına minlərlə şikayət ərizəsi yollayıblar. Rayonun ziyalıları dəfələrlə Bakıya gələrək yüksək vəzifəli dövlət məmurlarının qəbulunda olub, icra başçısının əməllərinə son qoymağı xahiş ediblər. Lakin Qəzənfər Ağayev rayon əhalisinin sərt təpkisinə baxmayaraq, vəzifəsindən çıxarılmayıb.
Onu da xatırladaq ki, ötənilki bələdiyyə seçkiləri ərəfəsində Masallıda icra başçısına qarşı bir xalq etirazı başlamışdı. Həmin aksiya bələdiyyə seçkilərinə qatılmaq istəyən ata-oğul iki sahibkarın icra başçısı Qəzənfər Ağayevin göstərişi ilə həbs olunması ilə bağlı idi. İcra başçısının ünvanına kəskin ifadələr işlədən bir sıra ziyalılar Qəzənfər Ağayevə və onun arxasında dayananlara çox sərt mesaj göndərmişdilər. Qeyd edək ki, Masallı rayonu cənub bölgəsi ilə paytaxt və digər rayonlar arasında qapı rolunu oynayır. İrandan ölkəyə gətirilən narkotik maddələrdən tutmuş digər qaçaqmalçılığa qədər hər şey bu rayondan keçirilir.
Ağayevin rayondakı əməlləri bununla da bitmir. Dövlətin ayırdığı vəsaitləri yeyərək, müəyyən iş üçün ayrılan vəsaitin öədənilməsini isə yerli məmur və sahibkarların boynuna qoyur. Buna misal olaraq, bir neçə ay bundan qabaq rayonun Güllütəpə və digər kənd yollarının asfaltlaşdırılması məqsədilə hökumət tərəfindən küllü miqdarda pul ayrılmışdı. Məlumata görə, həmin vəsait ayrılan zaman Qəzənfər Ağayevə pulun qəpiyinə kimi yolun çəkilməsinə xərcləmək tapşırılmışdı. Lakin icra başçısı bu dəfə də verilən tapşırıqlara məhəl qoymayaraq, pulu həzmi-rabedən keçirmişdi. Üstündən bir neçə gün keçdikdən sonra öz adamlarını rayonun canına salaraq həmin pulun yığılıb verilməsini tələb etmişdi. Görünür, Qəzənfər Ağayev rayonun abadlaşdırılması üçün ayrılan pulları mənimsəyərək, işin görülməsi üçün yuxarıdan verilən tapşırıqları da qulaqardına vurur.
7GUN.AZ