Lerik rayonunda pensiya və əməkhaqları gecikdirilir. Bu barədə 7GUN.az xəbər portalına Lerik rayonundan məlumat daxil olub. Məlumatda bildirilir ki, rayonun Osyodərə və Züvüç kənd ərazi nümayəndəliklərinə daxil olan kəndlərdə pensiya və əməkhaqlarının verilməsində problem yaranıb. Sakinlərin sözlərinə görə, bu cür süni problemlər dəfələrlə müşahidə olunub. Onların şikayətlərinə cavab olaraq rayon rəhbərliyi isə bildirib ki, rayona pul gec daxil olur.
Mənbə bildirir ki, hazırda rayonda pensiya və əməkhaqları verilməyib və əməkhaqlarını ala bilməyənlər dövlət təşkilatlarında çalışanlar, yəni əsasən müəllimlər, həkimlər, mədəniyyət işçiləri və təqaüdçülərdir. O da vurğulanır ki, əməkhaqlarının gecikdirilməsində rayon rəhbərliyinin də marağı var.
Məsələ ilə əlaqədar Lerik Rayon İcra Hakimiyyəti başçısının birinci müavini Cəlil Baxşıyevlə əlaqə saxladıq. O bildirdi ki, rayonda belə bir problem yoxdur: “Birincisi bu məlumat doğru deyil, bir həftədən çoxdur pensiya və maaşlar verilib. İkincisi də mən pensiya idarəsinin müdiri deyiləm. Gedin, bu problemi onlardan soruşun”.
Problemlə bağlı, Lerik rayon DSMF müdiri Təzəxan müəllimlə əlaqə saxlamağa çalışsaq da, zənglərimiz cavabsız qaldı.

7GUN.az