Sürüşmə nəticəsində yolun 3 metrdən artıq hissəsində 50 metrə yaxın yarğan yaranıb

Cənub bölgəsində intensiv yağan yağış Lerik-Lənkəran yolunun sürüşməsinə səbəb olub. Rayonun Fövqalada Hallar Komissiyasının sədri Habil Məlikovun anspress.com-a verdiyi məlumata görə, Lerik-Lənkəran yolunun 18-ci kilometrində yolun bir hissəsi sürüşüb. “Sürüşmə nəticəsində yolun 3 metrdən artıq hissəsində 50 metrə yaxın yarğan yaranıb. Beləliklə də, yolun bir hissəsi bağlanıb”.
Hazırda rayonda hava hələ də yağıntılı olduğundan Habil Məlikov torpaq sürüşməsinin davam edəcəyindən ehtiyatlandıqlarını bildirib. “Torpaq daha çox yumşalıb. Ona görə də, qorxuruq ki, daha böyük fəsadlar yaransın. Düzdür, hazırda hadisə yerində bizim texnika və fəhlələr çalışır. Amma bu problem dövlət səviyyəsində həll edilməlidir. Bu yola alternativ yol çəkilməlidir”.
İcra başçısının müavini onu da əlavə edib ki, əgər belə davam edərsə, yol hərəkət üçün tamam yararsız olacaq və bölgə ilə əlaqə tamam kəsiləcək.
Qeyd edək ki, 25 oktyabrından yağan güclü yağış Lənkəran rayonunda bir çox fəsadlara da səbəb olmuşdu. Lənkəranda bir çox küçələr və evlər su altında qalmışdı. Məlumata görə, hazırda su çəkilməkdədir. Problemin aradan qaldırılması istiqamətində işlər getsə də, havanın yağışlı olması problemin hələ də tam aradan qaldırılmasına imkan verməyib.

7GUN.AZ