Elçin Namazov: “Azərbaycanda təzyiqlərə məruz qalan vəkillər, vəkilliyin problemləri, həmçinin öz problemimiz barədə ətraflı məlumat verdik”

Vəkillər Kolegiyasından (VK) uzaqlaşdırılan iki vəkil - Xalid Bağırov və Elçin Namazov bu gün Avropa İttifaqının ölkəmizdəki nümayəndəliyində çağrılıb. Bu barədə 7GÜN.AZ xəbər portalına vəkil Elçin Namazov məlumat verdi. O bildirdi ki, səfirlə görüşərkən ölkədəki mövcud durum və vəkillərin qarşılaşdıqları problemlər, VK-nın onlara qarşı çıxardığı qərəzli və əsassız qərar müzkirə olunub:
“Bu gün mən və Xalid Bağırov Avropa İttifaqının Azərbaycandakı nümayəndəliyinə çağırıldıq və səfirlə görüşdük. Səfirliyin bir neçə əməkdaşı ilə də həmçinin Azərbaycanda təzyiqlərə məruz qalan vəkillər, vəkilliyin problemləri, həmçinin öz problemimiz barədə ətraflı məlumat verdik. Bildirdilər ki, Avropa İttifaqı məsələni gündəmdə saxlayacaq və vaxtaşırı məlumatları yayımlayacaq. Görüş təxminən iki saat çəkdi. Sabah isə ABŞ səfirliyində görüşümüz var”.
Vəkil bildirdi ki, yaxın günlərdə ABŞ Dövlət Departamenti Avropa və Qafqaz ölkələri üzrə direktoru Justin Fredmanla da görüşəcəklər. Onun sözlərinə görə, vəkillərin qarşılaşdığı problem artıq ölkə sərhədlərindən kənarda da müzakirə tələb edir və bu sahədə ciddi görüşlər keçiriləcək: “Oktyabrın 5-i ABŞ Dövlət Departamentinin Avropa və Qafqaz ölkələri üzrə direktoru cənab Justin Friedman Bakıya səfər edəcək. O, həmin gün saat 6-da ABŞ səfirliyində Vəkillər Kollegiyasının qərarı ilə vəkillik fəaliyyətindən kənarlaşdırımış vəkillərlə görüş keçirəcək. Görüşə dəvət olunanlar arasında mən də varam”.
Məsələ ilə bağlı vəkil Xalid Bağırovun da fikirlərini öyrəndik. O bildirdi ki, məsələ olduqca ciddidir və artıq xarici ölkələrin nümayəndəlikləri də bunun fərqinə varmağa başlayıblar: “Bu görüşdə Avropa Birliyinin səfiri və əməkdaşları Ovidiu-Viorel Naftanaila, Luidas Kolesinskas iştirak etdilər. Görüş zamanı vəkiliyin ümumi problemləri, vəkillərin son zamanlar kollegiyadan uzaqlaşdırılması ilə bağlı yaranan problemlərin səbəbləri və bunun son zamanlar baş verən siyasi hadisələrlə əlaqədar olub-olmaması ilə maraqlandılar. Biz də vəkillərin yaşdığı problemin cəmiyyətdə baş verən hadisələrlə birbaşa bağlı olduğunu göstərdik, problemi təfərrüatı ilə onların diqqətinə çatdırdıq”.



7GUN.AZ