Sakinlər Kür daşqınları zamanı dəyən zərərin ödənilməməsindən narazıdırlar

Bu gün Sabirabadın Balahəşimxanlı kəndinin bir qrup sakini Fövqəladə Hallar Nazirliyi qarşısında etiraz aksiyası keçirib. “Qafqazinfo”nun məlumatına görə, kənd sakinləri 2010-cu ildə baş verən Kür daşqınları ilə bağlı dəyən zərərin ödənilməsi istiqamətində indiyə qədər heç bir addımın atılmamasından şikayət ediblər. Heç bir kompensasiya almadıqlarını bildirən sakinlər daha sonra aksiyanı Prezident Administrasiyasının qarşısında davam etdiriblər.
Qeyd edək ki, bir müddət əvvəl Balahəşimxanlı kənd sakinləri evlərinin tikintisi üçün kəndin icra başçısı Namid Qurbanov, onun müavini Alxas İmanov, İcra nümayəndəliyinin mühasibi Şahin Qasımovun onlardan 2500-3000 manat rüşvət istədiklərini bildirmişdilər.