Ağdam klubu 5 pillə aşağı düşüb

Beynəlxalq Futbol Tarixi və Statistikaları Federasiyası (İFFHS) dünyanın ən güclü klublarının reytinq cədvəlini açıqlayıb.
400 komandanın yer aldığı siyahının ilk 3 pilləsində dəyişiklik olmayıb.
Əvvəlki kimi, “Barselona” 331 xalla liderliyini davam etdirir. Digər ispan nəhəngi “Real” (305) isə ikinci pillədədir. İlk “üçlüy”ü 282 xalla İngiltərənin “Mançester Yunayted” klubu tamamlayır.
Azərbaycanın İFFHS-da yeganə təmsilçisi “Qarabağ” isə ötən ayla müqayisədə 5 pillə geriləyərək, 313-cü sıraya enib. Aktivində 70,5 xal olan Ağdam klubu sentyabr ayında 308-ci pillədə qərarlaşmışdı.
Qurban Qurbanovun komandası Ekvadorun “Nasional”, Kolumbiyanın “Deportivo” və Koreya Xalq Demokratik Respublikasının “Pusan” klubları ilə eyni xala malikdir.


7GUN.AZ