İsveç ən yaxşı ikinci kimi finala vəsiqə qazandı

Ötən gün keçirilən oyunlarla AÇ-2012-nin seçmə mərhələsinə yekun vurulub.
Qrup mərhələsini ikinci yerdə başa vuran komandalar AÇ-2012-də iştirak etmək üçün "play-off"da qüvvəsini sınayacaqlar.
A qrupunda Türkiyə, B qrupunda İrlandiya, C qrupunda Estoniya, D qrupunda Bosnia - Hersoqovina, F qrupunda Xorvatiya, G qrupunda Çernoqoriya, H qrupunda Portuqaliya və İ qrupunda Çexiya isə yığmaları "play-off" mərhələsində oynayacaqlar.
E qrupunda Hollandiya yığmasından 3 xal geri qalan İsveç millisi isə ən yaxşı ikinci komanda kimi Avropa çempionatının final mərhələsinə vəsiqə qazanıb. İsveçlə yanaşı, bütün qrup birinciləri də AÇ-nın final mərhələsində iştirak etmək hüququ əldə ediblər. Seçmə mərhələni qalib baş vuran komandaların siyahısı isə belədir: Almaniya (A), Rusiya (B), İtaliya (C), Fransa (D), Hollandiya (E), Yunanıstan (F), İngiltərə (G), Danimarka (H) və İspaniya (İ). Bu komandalarla bərabər, Avropa çempionatına ev sahibliyi edəcək Ukrayna və Polşa milliləri də AÇ-2012-nin final mərhələsindəki rəqiblərini gözləyir.
Qeyd edək ki, "play-off" mərhələsinin püşkatma mərasimi oktyabrın 13-də keçiriləcək. İlk oyunlar noyabrın 11-12-də keçiriləcəyi halda, cavab görüşləri isə 4 gün sonra baş tutacaq.


7GUN.AZ