Azərbaycan yığmasının boksçusu Məhəmmədrəsul Məcidov Dağıstanda böyük coşqu ilə qarşılanıb

Bakıda keçirilən dünya çempionatında superağır çəkidə qızıl medal qazanan Azərbaycan yığmasının boksçusu Məhəmmədrəsul Məcidov anadan olduğu Dağıstanın Akuşinsk rayonunda böyük coşqu ilə qarşılanıb. Qol.Az-ın məlumatına görə, millimizin üzvünü rayonun girəcəyində xeyli sayda insan qarşılayıb.
Bundan sonra şadyanalıq yerli administrasiyanın binası önündəki meydanda davam etdirilib. Akuşinsk rayonunun icra başçısı Məhəmməd İsmayılov və digər rəsmi şəxslər çıxış edərək, Məcidovun dünya çempionatında parlaq qələbə qazandığını qeyd ediblər. Boksçumuzun 2012-ci ildə Londonda keçiriləcək Yay Olimpiya Oyunlarında da uğurla çıxış edəcəyinə əminlik ifadə olunub. Məhəmməd İsmayılov rayon sakinləri adından Məhəmmədrəsul Məcidova “Lada Priora” avtomobilinin açarlarını təqdim edib.
Qeyd edək ki, boksçumuzun atası Yusup Məcidov milli idman növləri üzrə dəfələrlə Dağıstan və Şimali Qafqaz çempionu olub.

7GUN.AZ