Elvin Məmmədov: “Əgər "Kəpəz"ə uduzsaydıq, turnir cədvəlindəki yerimizi itirə bilərdik”

"Bakı"nın yarımmüdafiəçisi Elvin Məmmədov “Kəpəz”lə keçirilən oyunun nəticələri ilə bağlı Premyerliqa.az saytına müsahibə verib. Müsahibənin maraqlı olduğunu nəzərə alıb, olduğu kimi oxucularımıza təqdim edirik.


- "Kəpəz"lə oyunda inamlı qələbə qazandınız. Oyunla bağlı nə deyə bilərsən?

- Yaxşı oyun oldu. Əsas odu ki, qələbə qazandıq, yaxşı nəticə qazandıq. Bu qələbə bizə çox lazım idi. Çünki uduzsaydıq, mövqeyimizdən uzaqlaşacaqdıq. Amma qalib gəldik, qarşıdakı oyunlara baxmaq lazımdı.

- Rəqibin qapısından 3 top keçirdiniz. Hətta qollardan birinin ötürməsini də sən verdin...

- Bəli. Mənim üçün də yaxşı oldu. Yavaş-yavaş formaya düşünürəm. İnşallah getdikcə daha yaxşı çıxış edəcəm.

- Birinci dövrədə "Kəpəz"lə oyunda böyük hesabla məğlub olmuşdunuz və ən azından bunun əvəzini çıxmaq istəyirdiniz. Yəqin bu amil sizi qələbəyə daha da ruhlandırır və oyunun əhəmiyyətini artırırdı…

- Əlbəttə, bu amilin də təsiri var idi. Ancaq biz hər oyuna ciddi yanaşırıq. Əgər "Kəpəz"ə uduzsaydıq, turnir cədvəlindəki yerimizi itirə bilərdik. Çünki "Qəbələ" gəlir arxadan. Sabah oyunları var. Biz uduzsaydıq və onlar sabah qələbə qazansalar, bizimlə xallarını bərabərləşdirəcəkdilər.

- Meydançanın vəziyyəti elə də yaxşı deyil. Ümumiyyətlə, həmin ot örtüyündə oynamaq əlavə çətinlik yaratmadı?

- Bəli. Mən hələ tam formada deyiləm. Meydança demək olar ki, palçıq idi. Hərəkət eləmək olmurdu. İstər-istəməz ikiqat güc sərf etməli olduq.

- Hesab arasındakı fərq azaldıqdan sonra "Kəpəz" bütün qüvvə ilə irəliyə atıldı və "Bakı"ya çətin anlar yaşatdı. Həmin vaxt ikinci qolu buraxsaydınız, necə olacaqdı?

- Düzdü, işimiz çox çətin olardı, təşvişə düşərdik. Amma bizim də imkanlarımız oldu. Sadəcə istifadə edə bilmədik. Çünki gücümüz qalamamışdı. Meydançanın vəziyyəti komandanı tamam yormuşdu.

- Hakimliklə bağlı nə deyə bilərsən? Elçin Məmmədovun idarəçiliyindən razı qaldın?

- Elçinlə bağlı onu deyə bilərəm ki, Azərbaycanın ən yaxşı hakimlərindən biridi. "Kəpəz" ev komandası olduğu üçün, onlara oldu. Amma çox da dərin səhvlərə yol vermədi. Mən onun idarəçiliyini bəyənirəm. Meydanda öz sözünü deyə bilir. Futbolçular ondan çəkinir.

- Artıq Jaba da "Bakı"nın əsas heyətinə qayıtdı. Hətta bugünkü görüşdə forma da geyindi. Braziliyalı hücumçunun dönüşü "Bakı"nın oyununa necə təsir edəcək?

- Jaba yenicə qayıdıb əsas heyətə. Bugünkü görüşdə biz ona kömək edə bilmədik. Hücum xəttində tək qaldı. İstənilən halda hücumçu üçün 5 müdafiəçiyə qarşı oynamaq çox çətindi. Amma bilinir ki, səviyyəli futbolçudu. Amma cari mövsümdə Premyer Liqada ilk oyunu olduğunu nəzərə alsaq, pis təsir bağışlamadı. Top saxlamağı, vuracağı qollar bizə gələcəkdə çox kömək edəcək.

7GUN.AZ