"QƏBƏLƏ"NİN BELƏ QAPALI FUTBOL OYNAYACAĞINI GÖZLƏMİRDİM"

"Neftçi"nin futbolçusu Bahodir Nasimov açıqlama verib. Premyer Liqanın hazırkı bombardiri "Qəbələ" klubuna məğlubiyyətə münasibət bildirib.

"Neftçi" bu mövsüm ancaq hücum və açıq futbol oynayır. "Qəbələ" öz meydanında oynamasına baxmayaraq, demək olar ki, 90 dəqiqə müdafiəyə oturmuşdu. Doğrusu, "Qəbələ"nin doğma divarlar arasında belə qapalı futbol oynayacağını gözləmirdim. Bugünkü "Neftçi"nin qarşısını almaq üçün rəqiblərin yeganə yolu müdafiə futbolu oynamaqdır. Liderliyə yüksəlmək şansımızı əldən verdik. Amma çempionat mayda bitir. Çempionluq uğrunda mübarizəni davam etdiririk və itirilmiş xalların əvəzini mütləq çıxacağıq. Millidən zədəli döndüyüm üçün istənilən oyunu sərgiləyə bilmədim. Bu görüşdəki hakimliklə bağlı çox danışırlar. Oyunun əvvəlində Flavinyodan top alarkən, rəqib futbolçunu keçmək istədim, o isə bilərəkdən əllə oynadı. Hakim 11 metrlik cərimə zərbəsi verməli idi, amma vermədi. Əslində, hakim 90-cı yox, 10-cu dəqiqədə penalti təyin etməli idi. "Neftçi"yə qarşı qərəzli mövqe göstərmək düzgün deyil" - deyə, Nasimov klubun saytına vurğulayıb.

Xatırladaq ki, "Qəbələ" - "Neftçi" oyununun baş hakimi Ramil Diniyev olub.