7GUN.az-ın araşdırma qrupu bir müddət öncə Masallı rayon sakinlərindən alınan məlumatlara əsasən rayonun Maliyyə İdarəsinin müdiri Azər Abdullayevin cinayət xarakterli əməl və hərəkətləri barədə məqalə dərc etmişdi.

Məqalədə həmçinin Azər Abdullayevin evindən 3 milyon manat məbləğində pul, küllü miqdarda qızıl- zinət əşyaları və brilliant qaşların oğurlanması haqqında xəbərlər də yer almışdı. Qarşı tərəfin də mövqeyini dərc edəcəyimizi və araşdırmaları davam etdirəcəyimizi bildirmişdik.

Etibarlı mənbələrdən öyrəndiyimizə görə məqalədə göstərdiyimiz faktlar doğrudur. Azər Abdullayev idarə və təşkilatlara ayrılan əmək haqqlarına, pul köçürtmələrinə, biznes və digər layihələrin maliyyələşməsi üçün tərtib edilən sənəd və arayışların təsdiq olunmasından ötrü külli miqdarda rüşvət alır. Hətta müvafiq miqdarda rüşvət almadan pensiyaların və müavinətlərin buraxılışına razılıq vermir. Azər Abdullayev bildirir ki, idarə faizə otuzdurulub , haqq- hesab ödəyirik, qaydalar dəyişməyib.

7GUN.az olaraq dəfələrlə qeyd etmişik ki, Masallı rayonunda müəllimlərin, həkimlərin və dövlət büdcəsindən maliyyələşən digər təşkilatlatların işçilərinin əmək haqqlarından məcburi tutulmalar haqqında məlumatlar vardır. Rüşvət olaraq müxtəlif instansiyalara ötürülən həmin pul tutulmaları Maliyyə İdarəsində Azər Abdullayevin nəzarəti ilə aparılan bölgülərə əsasən reallaşır.

Azər Abdullayev sıradan bir məmur kimi hakimiyyətin yuxarı dairələrində müəyyən edilmiş cədvəl üzrə işləyir. Buna görə də cinayət xarakterli əməl və hərəkətlərinə rəğmən toxunulmazdır. Mövcud idarəetmə rejimində günün reallığı belədir- daha çox yedizdir və çox faydalan!

Qarşı tərəfin də mövqeyini dərc etməyə hazırıq.

7GUN.az-ın araşdırma qrupu.